Казахстан улсын ихэнх нутагт хавар болж цас хайлахтай зэрэгцэн шар усны үер буулаа. Гүүр болон хурдны замын бүх хэсэг усанд автсан, зарим орон сууцны хороолол цэвэр, бохир усны сүлжээ тасарчээ. Шар усны үерийн улмаас одоогийн байдлаар гурван хүн амиа алдсан байна.

Энэ сарын эхээр бууж эхэлсэн үер долоон бүс нутгийг хамарснаас, зүүнхойд нутгийн хэсэг хамгийн их хохирол амсжээ. Гуравдугаар сарын 29-ний байдлаар 4700, тэр дундаа 1700 хүүхдийг аварч, өөр аюулгүй газарт нүүлгэн шилжүүлсэн байна. Одоогоор орон сууцны 500 барилга усанд автжээ. Түүнчлэн зарим бүс нутагт нутгийн захиргааны байр, суургууль, эмнэлэг зэрэг төрийн байгууллагууд усанд автсан байна. Казахстан улсын Ерөнхий сайд Олжас Бектенов энэ жилийн шар усны үерийг сүүлийн жилүүдэд тохиолдож байгаагүй гамшиг гэж зарлажээ. Чухам юуны улмаас учирсан хохирлын хэмжээ их байгааг тогтоохоор ажлын хэсэг байгуулагдаж, зарим нутгийн захирагчдыг мөрдөн шалгах ажиллагааг эхлүүлсэн байна.

ОХУ-ын Өмнөд Сибирийн бүс нутагт орших Алтайн хязгаарт шар усны үер буужээ. Одоогийн байдлаар 90 барилга байгууламж, 600 орон сууц, нийтийн үйлчилгээний 7 байгууламжийн барилга усанд автсан байна. Орон нутгийн захиргаа төв засгийн газрын өгсөн чиглэлийн дагуу аврах ажиллагаа зохион байгуулж, орон сууцны иргэдийг өөр аюулгүй газарт нүүлгэн шилжүүлжээ.