Корона вирусаас улбаалан дэлхий даяар цар тахал гарч олон улс хөл хорио тогтоож, аялал жуулчлалын салбар уналтад орсны дараах үеэс гадаадын жуулчдыг татах төрөл бүрийн үйл ажиллагааг өрнүүлж эхэлсэн. Үүнээс үүдэлтэйгээр газар авсан “дижитал нүүдэлчний виз” гэх ойлголт бий бөгөөд жуулчид аливаа нэг улс оронд аялахдаа элчин сайдын яаманд биечлэн очилгүйгээр онлайн сүлжээгээр хил нэвтрэх зөвшөөрөл авахыг хэлж буй юм. Үр дүнд нь, дижитал нүүдэлчид сүүлийн гурван жилд дэлхий нийтийн эдийн засагт 787 тэрбум ам.долларын хувь нэмэр оруулсан нь зорилтот арга хэмжээ ямар ашигтайг харуулсан байгаа юм.

Уг виз нь аялал жуулчлалаас гадна олон улсын хөдөлмөрийн зах зээлд өгөөжөө өгч дижитал нүүдэлчний визийг ашиглан алсын зайнаас ажиллах сонирхолтой хүмүүсийн тоо эрс өсөөд байгаа юм байна. Хувийн эрх чөлөө, ажил, амьдралын тэнцвэрээ хадгалах, бусдын соёл иргэншлийг судлах хүсэлтэй хүмүүс уг визийг ашиглан дэлхийн өнцөг булан бүрт очсон ч хөдөлмөр эрхлэх боломжтой болсон нь тун гайхалтай юм. Жишээ нь, АНУ-ын иргэн Жорж Бразилийн үзэсгэлэнт далайн эрэг дээр суугаад Вашингтон дахь ажлаа хийдэг болно гэж ойлговол илүү дөхөм болов уу. Саяхан явуулсан судалгаагаар 2019 онд АНУ-ын хэмжээнд 7.1 сая дижитал нүүдэлчин байсан бол 2024 оны төгсгөлд энэ тоо 147%-иар өсөж, 18.1 саяд хүрчээ. Үнэндээ, дижитал нүүдэлчин гэх ойлголт 1997 онд бий болсон бөгөөд дээр дурдсанчлан дэлхийн хэмжээний цар тахлын нөлөөгөөр улам түгэн дэлгэрсэн байна. Товчхоноор тайлбарлахад аялангаа ажилладаг хүмүүсийг дижитал нүүдэлчин гэх болжээ.

Мөн энэ салбарт хөдөлмөр зуучлалын үйл ажиллагаа явуулдаг “Номад капиталист” компаниас 2025 онд дижитал нүүдэлчдэд хамгийн ээлтэй улс орнуудаар Коста Рика, Гүрж, Тайланд, Индонез, Малайз, Мальта, Португал, Испани, Антигуа ба Барбуда, Барбадос, Мексик, Арабын Нэгдсэн Эмират Улсыг нэрлэжээ. Шалтгаан нь, эдгээр орнуудад интернетийн сүлжээ найдвартай, аюулгүй байдал сайтар хангагдсан, амар тайван, үзэсгэлэнт байгаль, үзэмжит хот суурин, гол нь татварын системийн хүнд суртал маш бага аж.