ОХУ-ын түрэмгийлэл эхэлсэн 2022 оны хоёрдугаар сараас хойш нийт нэг сая долларын авлига авсан Украинийн зэвсэгт хүчний ахлах сэтгэлзүйчийг баривчилж, “хууль бусаар хөрөнгөжсөн” гэх үндэслэлээр ял тулгажээ. Тус улсын Тусгай албанаас гаргасан мэдэгдэлд хэрэгтэн цэргийн албанд шинээр элсэгчдийг тэнцүүлэх ажлыг хариуцдаг байсан байна. Иймд цэргийн албанаас зайлсхийсэн хүмүүст хуурамч магадлагаа гаргаж өгдөг байсан гэсэн үг. Хэдийгээр хэрэгтний нэрийг зарлаагүй ч Олег Друз гэгч хүн зэвсэгт хүчний ахлах сэтгэл зүйчээр ажилладаг байсан талаар ВВС мэдээллээ.

Хууль бусаар хөрөнгөжсөн хэргийг шалгах явцад хэрэгтэн Киев хотын ойролцоо гурав, Одес хотод нэг орон сууцтай, мөн хоёр эдлэн газартайгаас гадна хэд хэдэн тансаг зэрэглэлийн БМВ машинтай байжээ. Гэрт нь нэгжлэг хийж, 152,000 доллар, 34,000 евро бэлнээр илрүүлэн хурааж авчээ. Хэрэгтэн хууль бусаар олж авсан эд хөрөнгөө эхнэр, охин, хүү болон гурав дагч этгээдийн нэр дээр бүртгүүлсэн байв.

Цэрэгт дайчлагдахаас зайлсхийсэн хүмүүст хуурамч магадлагаа гаргаж өгсөн болон хууль бусаар хөрөнгөжсөн этгээдэд арван жил хорих ял төлөвлөж байгаа гэнэ. О.Друз нь 2017 онд ижил хэрэгт холбогдож, албан тушаалаасаа халагдаж байсан юм байна.

Украинд авлигалын хэрэг нэлээд газар авсан гэдэг бөгөөд өнгөрсөн оны тавдугаар сард тус улсын парламентийн гишүүн 220,000 фунт хувьдаа завшсан хэргээр ял сонсож байсан бол 2023 онд 30 гаруй албан тушаалтанд авлига, дайны хөлөөс дүрвэсэн иргэдийг төлбөр авч хилээр гаргасан хэргээр хуулийн хариуцлага хүлээлгэжээ.