“Салбарын мэргэжилтнүүдийн тооцоолж буйгаар цахиурын зах зээл ирэх жилүүдэд эрчимтэй тэлж, 2030 он гэхэд 100 тэрбум ам.долларт хүрнэ. Хэрэгцээ өсөж байгаа ч ханган нийлүүлэх тал дээр саатал үүссэн” гэж Трой Минералсийн Ерөнхийлөгч Яннис Цитос “Investing News Network”-д ярьжээ.

Канад төвтэй Трой Минералс нь Монгол Улс дахь Цагаан Залаагийн дээд зэргийн цэвэр цахиурын ордын төслийг хэрэгжүүлэхээр зөвшөөрөл авах хүсэлтээ гаргасан. Ажлын төлөвлөгөөний дагуу уурхайн үйл ажиллагаа 2025 онд эхлэх ёстой аж. Я.Цитос ойрын саруудад зөвшөөрлөө авахаар хөөцөлдөж байгаа гэв.

Ноён Я.Цитос Трой Минералсийн өсөлтийн стратеги дээд зэргийн цэвэр цахиур, ванади зэрэг чухал ашигт малтмал мөн газрын ховор элементэд чиглэж буйг онцолжээ. Ингэснээр ногоон эдийн засаг, дэвшилтэт технологид нэн шаардлагатай түүхий эдийн өсөж буй хэрэгцээ, шаардлагыг капитал болгохыг зорьж буй гэв.

Цагаан Залаагийн орд нь БНХАУ-ын хилд ойр байрлалтай учир дэлхийн хамгийн том цахиурын зах зээлд хугацаа алдалгүй нэвтрэх стратегийн ач холбогдолтой юм. Дэлхий дээр цахиур хангалттай их боловч дээд зэргийн цэвэр нь маш ховор. Монголын Цагаан Залаагийн цахиур 98.99% цэвэр гэсэн үг. Нарны гэрэл хуримтлуулж, цахилгаан, эрчим хүч үйлдвэрлэх хавтан хийхэд хамгийн сайн нь гэж ойлгож болно.

Трой Минералс одоогийн байдлаар Канадын Ширээт Уулын дээд зэргийн цэвэр цахиурын төслөө урагшлуулж байгаа бөгөөд Хойд Америкийн зах зээлийг бүрэн хангах амбицтай ажиллаж байгаа юм байна. Дээрх хоёр төслийг хэрэгжүүлэх нь үйлдвэрлэлийн явц хэд дахин түргэсч гадаадын капиталын хамаарлаас гарах, хувьцаа эзэмшигчдийн итгэлийг бэхжүүлэх чухал стратеги юм гэж Я.Цитос тайлбарлалаа.

Трой Минералс цахиур олборлох ажлаа эхлүүлснээр туршлагатай удирдлага, өндөр чанартай бүтээгдэхүүн богино хугацааны мөнгөн урсгал, урт хугацааны эрчимт өсөлтийг бий болгоно. Иймд 2025 он “гайхамшигт жил” болох нь ойлгомжтой гэж Я.Цитос амлажээ.