“Ерөнхийлөгч Хавьер Милей Аргентин улсыг Дэлхийн эрүүл мэндийн байгууллагын гишүүнчлэлээс хасуулах зааварчилгааг Гадаад хэргийн сайд Жерардо Вертхайнд өгсөн. Бидний зүгээс олон улсын байгууллагууд манай улсын тусгаар тогтнол, тэр дундаа эрүүл мэндийн асуудалд хөндлөнгөөс оролцохыг зөвшөөрөхгүй” гэж Ерөнхийлөгчийн хэрэг эрхлэх газрын хэвлэлийн төлөлөөгч Мануэль Адорни өчигдөр мэдээлжээ. Тус улсын ийнхүү НҮБ-ын харьяаны ДЭМБ-аас гарахаар шийдсэн нь АНУ-ын Ерөнхийлөгч Дональд Трампын өнгөрсөн сард хийсэн ижил алхмын тусгал болж байна гэж CNN уламжлав.

М.Адорнигийн тайлбарласнаар ДЭМБ нь эрүүл мэндийн менежментийн алдаатай ажилласан, нэн ялангуяа цар тахлын үед хүн төрөлхтний түүхэн дэх хамгийн урт хөл хорио тогтоож, улс орнуудын тусгаар байдал, улс төрийн нөлөөнд шууд халдсан. Түүний зэрэгцээ ковидоос сэргийлэх арга хэмжээ авах хугацаандаа эдийн засгийн асар их хохирол амсахад хүргэсэн тул ирээдүйд тохиолдох болзошгүй байдлаас сэргийлж, ДЭМБ-аас гарах нь зөв гэж үзсэн байна.