“Дани улсад одоо чухам юуг хэрэгтэйг мэдэх үү? Тэр бол нар шарж, далдуу мод найгаж, дугуйт тэшүүрээр гулгах өргөн сайхан зам талбай юм. Тэгэхээр, бидэнд нэгэн насны мөрөөдлөө биелүүлэх боломж гарлаа” хэмээн Данийн талаас гаргасан өргөх бичиг эхэлжээ. Энэ бол АНУ-ын талаас тавьсан Гринландыг худалдаж авах сонирхлоо илэрхийлсний хариу юм. Уг өргөх бичгийн зорилго нь АНУ-ын Калифорни мужийг худалдаж авахад шаардлагатай нэг их наяд доллар босгох олон нийтийн санхүүжилтийг татах зорилготой бөгөөд энэхүү элэглэлийг дэмжсэн 200,000 хүн гарын үсгээ зуржээ.

Өргөх бичигт дурдсан Калифорнийг худалдаж авах олон шалтгаанаас онцолбол таатай уур амьсгал бүхий орон нутагтай болох, авокадо жимсний хязгааргүй хангамжтай болох, технологийн салбар давамгайлах байр суурь эзлэх зэргийг нэрлэжээ. Үүнээс гадна Дани улс эрх чөлөөт ертөнцийг хамгаалахад хувь нэмрээ оруулаад зогсохгүй Диснейлендийн нэрийг өөрчилж, “Ханс Христиан Андерсенленд” болгоё ч гэжээ. Хэрэв тэгвэл Микки Мауст викинг дайчны дуулга өмсүүлнэ гэх зэргээр ёжилсон байна.

Өргөх бичигт дурдсанаар Калифорнийг худалдаж авсны дараа нэрийг нь Шинэ Дани гэж солиод Лос Анжелес хотын нэрийг норд галигаар “Løs Ångeles” болгоно гэжээ.

Д.Трамп өнгөрсөн сарын 20-нд Ерөнхийлөгчийн тангараг өргөсний дараа Гринланд арлыг АНУ-ын мэдэлд авах нь “туйлын шаардлагатай” гэж чухалчилж байсан билээ. Харин Гринланд болон Данийн эрх баригчдын зүгээс уг хүсэлтэд эрс татгалзсан. Данийн Засгийн газар шууд үгүй гэсэн бол өөртөө засах эрхтэй Гринландын зүгээс тус арал нь Америкийнх болохгүй, басхүү Данийнх ч биш гэж мэдэгдэж байсан юм.