Монгол Улс, БНХАУ-ын Ерөнхий сайд нар Гашуунсухайт-Ганцмод боомтын төмөр зам холболтын хэлэлцээрт гарын үсэг зурлаа. Энэ хүртэл 2004 оноос эхлэн яригдаж, 2008 оноос хойш 17 жилийн хугацаанд нийт 60 гаруй удаагийн яриа хэлэлцээ хийж, Үндэсний аюулгүй байдлын зөвлөлийн 3 зөвлөмж, Улсын Их Хурлын 6 тогтоол, Засгийн газрын 45 тогтоол гарсны эцэст ийнхүү гарын үсэг зурсан юм. Мөнхийн хөрш БНХАУ-тай холбож буй хоёр дахь төмөр зам нь энэ боллоо.

Замын-Үүд-Эрээний төмөр замаас хойших Монгол Улс, БНХАУ-ын анхны хил дамнасан төмөр зам болж буй энэхүү төмөр зам ашиглалтад орсноор нүүрсний экспорт жилд дунджаар 83 сая тонн байгаагаас 165 сая тонн хүрч, нүүрс борлуулалтын орлого жилд 1.5 тэрбум ам.доллароор нэмэгдэнэ гэж тооцоолж байгаа юм.

Монгол Улсын Ерөнхий сайд Л.Оюун-Эрдэнэ энэ тухай хэлэхдээ “Төмөр зам холбогдсоноор экспортын орлого нэмэгдэж, нэг хүнд ногдох дотоодын нийт бүтээгдэхүүний хэмжээ 10 мянган ам.доллар хүрэх зорилт биелнэ. Монгол Улсын нийт хүн амын орлогын албан татварын дүнгээс хоёр дахин их хэмжээний нэмэлт орлого олно” гэсэн юм.

Төслийн ТЭЗҮ-д тусгаснаас нь харвал хил дамнасан төмөр зам өргөн царигаар жилд 30 сая тонн, нарийн царигаар 10 сая тонн ачаа тээвэрлэх боломжтой. Төсөл бүрэн чадлаараа хэрэгжиж эхэлмэгц Монгол Улсын нүүрсний экспорт жилдээ 30-50 сая тонноор нэмэгдээд зогсохгүй тээврийн зардал хоёр дахин буурна гэж тооцоолжээ.