Монгол Улсын голлох хөрөнгө оруулагчийн нэг Францын төрийн өмчит “Орано Майнинг” компанийн 2024 оны цэвэр ашиг гурав дахин өсжээ. Ийнхүү өссөн нь БНХАУ зэрэг улс орнуудын цөмийн эрчим хүчний үйлдвэрлэл, уран баяжуулалтын эрэлтээс шалтгаалсан байна. Түүнчлэн хамгийн том хүчин зүйл нь Японы АЦС-ын ашигласан түлшийг боловсруулах гэрээний орлого нь ч нөлөөлжээ.

Тус компани нь уран олборлохоос гадна Хойд Америк, Европ, Ази тивийн АТЦ-уудын түлшний хаягдлыг авч боловсруулан буцаан нийлүүлэх үйлчилгээ үзүүлдэг юм. Эрэлт нэмэгдэж, орлого өссөн энэ цаг үед “Орано Майнинг” компани шинэ төслүүдээ эрчимжүүлж, хуучин төслүүдээ эргэн сэргээхээр төлөвлөж байна.

“Орано Майнинг” компани өнгөрсөн сард Монгол Улсын Засгийн газартай 1.6 тэрбум ам.долларын урааны төслийн хөрөнгө оруулалтын гэрээнд гарын үсэг зурсан билээ. Одоогийн байдлаар тус компанийн олборлолтын нийт хүчин чадал 8200 тонн бөгөөд үүний 5000 тонныг Канад, 1200 тонныг Нигер, үлдсэнийг нь Казахстан улс бүрдүүлдэг байна.