Одоогийн байдлаар Канадын 170 мянга орчим иргэн уг өргөдөлд гарын үсэг зураад байна. Учир нь АНУ-ын Ерөнхийлөгчийн бүтцийн агентлагийг даргалж, Канадын бүрэн эрхт байдалтай холбоотой хэд, хэдэн байр суурь илэрхийлсэнд канадчууд бухимдаад байгаа аж. Анх энэ санаачилгыг Канадын зохиолч Куалиа Рид гаргаж, өнгөрсөн пүрэв гарагаас эхлэн өргөдөлд гарын үсэг цуглуулж эхэлсэн юм. Тус өргөдөлд “Канадын үндэсний ашиг сонирхолд илт харшлах үйл ажиллагаа явуулж, Канадын тусгаар тогтнолыг устгахыг санаархсан АНУ-ын Засгийн газрын гишүүн болсон” гэж дурджээ.

Илон Маск хэдийгээр Өмнөд Африкт төрсөн ч ээжийнхэн мэндэлсэн Канадын давхар иргэншилтэй байдаг аж. АНУ-ын Ерөнхийлөгч Доналд Трамп хоёр дахь бүрэн эрхийнхээ тангараг өргөснөөс нэг сар хүрэхгүй хугацаанд Канадын бараанд татвар оногдуулна гэж сүрдүүлж, АНУ-ын 51 дэх муж болох тухай хэд, хэдэн удаа мэдэгдсэн нь ийнхүү Канад иргэдийн дургүйг хүргэж байгаа юм. Илон Маскийн хувьд Засгийн газрын нэгж болох Засгийн газрын үр ашгийн газрыг удирдан, төрийн байгууллагуудын зардлыг танаж, цомхотгох бодлого баримталж байна. Түүнчлэн сүүлийн хэдэн сарын турш Илон Маск өөрийн эзэмшлийн “X” платформд Канадын Ерөнхий сайдыг илт шүүмжилж, “Дааж давахгүй арга хэрэглэдэг”, “бодлогогүй” гэх мэтээр постолж байсан билээ.

Иргэншил цуцлах өргөх бичигт гарын үсэг цуглуулах ажиллагаа зургаадугаар сарын 20-ны өдөр дуусна. Гэвч хууль ёсоор гарын үсгийн тоо 500 мянгаас давсан ч Засгийн газар эцсийн шийдвэр гаргах үүрэг хүлээхгүй гэж Канадын хэвлэлүүдэд нийтэлж байна.