Швейцарийн Альпийн нуруунд орших ажиллагаагүй хиймэл дагуулын антеннуудыг дахин шинэчилж, нарны эрчим хүчний үлгэр жишээ эх үүсвэр болгон ашиглаж эхэлжээ. Уулын оройд байрлах тэдгээр аварга хиймэл дагуулын тавган антеннуудын эргэн тойронд өндөр барилга гэх зэрэг саад байхгүй учир нарны эрчим хүчийг хураахад төгс тохиромжтой байгалийн давуу байрлал гэж үзсэн CKW групп энэ боломжийг ашиглахаар шийдсэн байна. Нам доор газартай харьцуулахад өндөрлөг бүсэд манан хүдэн татахгүй учир нарны гэрлийг хэрэгцээт хэмжээгээр хуримтлуулахад саадгүй.

Швейцарийн Леукэд байрлах 32 метрийн диаметртай хиймэл дагуулын антеннуудыг нарны хавтангаар бүржээ. Тус бүр нь 25 өрхийн цахилгааны хэрэглээг бүрэн хангах боломжтой гэж Ройтерс мэдээлэв. Хамгийн том давуу тал нь хиймэл дагуулын антеннууд нь сууриараа эргэдэг учир нарны хөдөлгөөнийг дагуулан тохируулах боломжтой учир илүү их үр дүнтэй гэж CKW групп онцолж байна.

Швейцарийн Засгийн газар эрчим хүчний хүндрэлээс сэргийлж, оршин суугчид болон албан байгууллагууд цахилгааны нөөцөө хэмнэх сайн дурын хөдөлгөөнд оролцохыг 2023 оны наймдугаар сараас хойш уриалж байгаа юм. Уг завшааныг ашиглаж, CKW группийн толгой зомпани Акспо группийн зүгээс дээрх санаачлагыг гаргасан нь энэ аж. Швейцарь улсад 2050 онд эрчим хүчний хямрал нүүрлэж, нэг жилд 50 терраватт цагийн цахилгааны хомсдолд орно. Нарны эрчим хүч бол хомсдолыг арилгах төгс шийдэл болно гэж Акспо группийнхэн таамаглаж байна.

Ийнхүү хаягдсан байгууламжийг ашиглах жишээ хэд, хэд байдгаас дурдахад Европын Холбоо Хүйтэн дайны үеийн хиймэл дагуулын зураглалын төхөөрөмжийг дахин сэргээж, экологийн өндөр ашигтай ойн бүсүүдийг олж тогтооход ашиглаж байгаа. Мөн энэ аргаараа устах аюулд орсон ойн бүсүүдийг олж, тодорхойлох ажлыг ч гүйцэтгэж байна. Мөн АНУ-д ашиглалтаас гарсан нүүрсний уурхайг сэргээгдэх эрчим хүчний үйлдвэр болгон ашигладаг юм байна.