Халдварт өвчин судлалын үндэсний төвийн мэдээлснээр өнгөрсөн 24 цагийн байдлаар улаанбурхан өвчний батлагдсан нийт тохиолдол 51-т хүрээд байна. Сүүлийн 24 цагийн байдлаар Улаанбаатар хотоос 12, Дундговь аймгаас 8, Өмнөговь аймгаас 4 тохиолдол тус тус батлагдаж, улсын хэмжээнд улаанбурхан авчний лабораториор батлагдсан 51 тохиолдол, сэжигтэй 11 тохиолдол бүртгэгдлээ.

Дундговь, Өмнөговь аймагт Улаанбурхан өвчний тохиолдол батлагдсантай холбогдуулан Политехникийн коллеж, бүх сумдын ЕБС, цэцэрлэг, хүүхдийн сургалтын байгууллага, Өдөр өнжүүлэх төвүүд болон хүүхдийн дунд зохион байгуулах аливаа үйл ажиллагааг 2025.03.15 - 2025.03.28-ныг дуустал түр хугацаанд хязгаарлаж, цахимд шилжүүлээд байгаа юм.

Иймд эцэг, эх, асран хамгаалагчид хүүхдийнхээ эрүүл мэндэд хариуцлагатай хандаж, улаанбурханы эсрэг товлолт вакцинд бүрэн хамруулсан эсэхийг тодруулах, товлолын дагуу улаанбурханы эсрэг вакцины 2 тунд хамрагдаагүй бол өрх, сумын эрүүл мэндийн төвд хандан улаанбурханы эсрэг вакцинд нөхөж хамруулахыг зөвлөлөө.

Хэрэв халуурсан, тууралт гарсан эсвэл улаанбурхан батлагдсан тохиолдолтой хавьтал болсон бол ХӨСҮТ-ийн яаралтай тусламжийн тасгийн 1 болон 2-р өрөөнд үзлэг, вакцинд хамрагдах шаардлагатай аж.