Торонтогийн их сургуулийн судлаачдын ахалсан баг дуран авайгаар цуглуулсан өгөгдлийг ангилж, жинхэнэ дохио, хөндлөнгийн шуугианыг ялгаж, таних шинэ алгоритм хэрэглэж харь гарагийн амьдралын судалгаагаа баримжаатай болгожээ. Энэ нь тэдэнд машин сургах аргаар оюун ухааны тусламжтайгаар мэдээлэл, өгөгдлийг түргэн хугацаанд ангилах боломжийг нээж өгсөн байна.

Эрдэмтэд технологиос үүдэлтэй байж мэдэх харийн найман дохио барьж авчээ. Байгалийн одон орон сэтгүүлд гарсан судалгааны материалаас үзэхэд Нарны аймгийн чанадаас ирсэн найман дохио нь оюун ухаант харь гарагийн амьдрал байгааг батлахгүй, гэхдээ судлаачид хиймэл оюун ухааны тусламжтайгаар оюун ухаант харь гарагийн амьдрал хайх эрэлд найдварын гэрэл асаалаа гэдгийг цохон тэмдэглэсэн байна.


Судалгааны ажлыг хамтран бичсэн Торонтогийн их сургуулийн одон орон судлаач Черри Нг хэлэхдээ “Оюун ухаант харь гарагийнхныг хайж олох эрэлд ахиц гарсанд би туйлаас их баяртай байна. Хиймэл оюун ухааны туслалцаатайгаар өөр соёл иргэншлээс илгээсэн байж болох олон янзын дохиог шинжилж, ангилж ялгах боломж нээгдэж байна” гэжээ.

Харь гарагийн оюун ухаантныг хайх ажиллагаа 1960-аад оноос эхтэй ба өндөр дэвшилтэт соёл иргэншлийн технологиос үүдэлтэй дохио буюу техносигнатурыг хайж олох, шинжлэхэд голлон анхаарч ажилладаг юм.