Трафигура компанийн гүйцэтгэх захирал Ричард Холтум Монгол Улсад болсон луйврын шинжтэй үйл явдал сургамж болсон бөгөөд цаашид засаглалыг сайжруулах тал дээр анхаарч ажиллана гэдгээ мэдэгджээ. Тэрбээр хэлэхдээ “Бидэнд асар их зүйл ойлгуулсан сургамжтай тохиолдол байлаа. Цаашид бид компанийн засаглалыг сайжруулах тодорхой бодлого хэрэгжүүлнэ” гэдгийг онцолсон байна.

Трафигура компани өнгөрөгч 2024 оны аравдугаар сард Монгол дахь үйл ажиллагаанд луйврын шинжтэй үйлдэл байгааг анх илрүүлж байсан юм. Гэмт этгээдүүд ханган нийлүүлэгчидтэй хэт өндөр дүнгээр гэрээ байгуулж, хугацаа хэтэрсэн авлагаа нуун дарагдуулсан болох нь тухайн үед илэрсэн билээ. Улмаар компанийн үйл ажиллагаанд сөргөөр нөлөөлж 1.1 тэрбум ам.долларын алдагдал хүлээснээ албан ёсоор мэдэгдэж байсан юм.

Одоогоор энэ хэрэгтэй холбогдуулан гүйцэтгэх захирал асан Жереми Вейр болон бусад албаны хүмүүсийг шалгаж байна. Өнгөрсөн долоо хоногт Монгол дахь луйврын шинжтэй үйлдлийг дэлхий нийт мэдээлсэн юм. “Trafigura Group” компанийн Монгол дахь салбарын захирал байгууллагынхаа хөрөнгөөс их хэмжэээий мөнгө эгчийнхээ компанид зээлдүүлсэн болохыг “Reuters” агентлаг мэдээлсэн байна. Тухайлбал 500 сая гаруй ам.долларыг нагац эгчийнхээ эзэмшдэг компанид зээлдүүлжээ. “Trafigura”-ийн Монголд хүлээсэн тэрбум ам.долларын алдагдалтай холбоотой хяналт шалгалтын хүрээнд салбарын захирал Э.Жононбаярыг ажлаас нь чөлөөлөөд байгаа юм. Түүний нагац эгч Д.Эрдэнэтуулын эзэмшдэг гэгдэж буй “Lex Oil” ХХК “Trafigura”-ийн Монгол дахь гол харилцагч нь байсан аж.

Монгол дахь салбарт болсон луйвар нь төв захиргаанаас хэт тусгаарлагдаж, хэл соёлын асуудал үүссэн нь голлон нөлөөлсөн болохыг Ричард Холтум тодотгожээ. Цаашид энэ үйл явдлыг дахин давтахгүй байхын тулд засаглалын шинэчлэл хийж, их цэвэрлэгээ хийх юм байна.