Он гарснаас хойш дөрөвдүгээр сарын 2-ны өдрийн байдлаар 16.3 сая тонн чулуун нүүрс экспортолжээ. Энэ нь өнгөрсөн оны мөн үетэй харьцуулахад 10.5% буурсан үзүүлэлт аж. Гэсэн ч харж болохуйц таатай мэдээлэл байгаа нь экспортолсон нүүрсний биет хэмжээ өмнөх сараас 6.1 сая орчим тонноор нэмэгдсэн байна.

БНХАУ-ын голлох боомтуудад нүүрсний нөөц ихээр бүрдэж улмаар, дотоодын эрэлт саарсан нь манайд сөргөөр нөлөөлж буй. Үүнийг салбарын сайд нь ч батлаад байна. Одоогоор Гашуунсухайтад нүүрсний овоолго үүссэн байгаа юм.

Унаж байгаа нүүрсний экспортыг нэмэгдүүлэхийн тулд биржийн арилжааны үнийг зах зээлийн үнэтэй уялдуулах арга хэмжээ аваад банйа. Гэсэн ч гадаад зах зээлийн нөхцөл байдал таагүй байна. Өчигдөр АНУ-ын Ерөнхийлөгч тарифын бодлого зарлаж “Чөлөөлөх өдөр” гэж зарласан нь дэлхий даяар тодорхойгүй нөхцөл байдал үүсгэлээ. Он гарснаас хойш унаад байсан нүүрсний үнэ цаашид ч унах магадлалтай байгааг шинжээчид анхааруулсаар буй.