Азийн хөгжлийн банк Монгол Улсын эдийн засаг 2024 онд 4.1% өснө гэж тооцоолон өмнөх төсөөлөл болох 5.9% байснаас огцом буурууллаа. Ингэж бууруулах болсон нь хэд, хэдэн шалтгаантай. Үүнээс нөлөөлөл үзүүлэх хамгийн том шалтгаан бол төсвийн тэлэлт, сүүлийн 10 жил тохиогоогүй зуд турхан гэж үзжээ. Зудын гамшгаас шалтгаалан хөдөө аж ахуйн салбар уналтад орж, улмаар эдийн засгийн өсөлтийг сааруулах үндсэн шалтгаан болно гэж тооцсон байна. Хэдийгээр Монгол Улсын инфляц саарах төлөв ажиглагдаж байгаа ч сүүлийн жилүүдэд байгаагүй өндөр түвшинд хэвээр байх тул эдийн засгийн өсөлтөд сөрөг нөлөөтэй гэж үзжээ.

Зудын гамшгаас үүдсэн сөрөг нөлөө 2025 оны эхний хагаст саарч, хөдөө аж ахуйн салбар сэргэн, уул уурхай болон үйлчилгээний салбар харьцангуй хурдан хугацаанд сэргэж, Монгол Улсын эдийн засаг 6% өснө гэж таамагласан байна.

Ташрамд дурдахад Дэлхийн банк энэ сарын эхээр Монгол Улсын эдийн засгийг 4.8% өснө гэж мөн л төсөөллөө бууруулсан бол дээрх дүгнэлтүүдээс шалтгаалан Монголбанк эдийн засгийн өсөлтийг төлвийг 3.8% болно гэж мөн л бууруулж төсөөлсөн юм. Одоогоор олон улсын санхүүгийн байгууллагуудаас ОУВС Монгол Улсын эдийн засгийг 6.5% байна гэж төсөөлжээ.
Монгол Улсын хувьд 2024 оны Төсвийн тухай хуульд эдийн засгийн өсөлтийг 7% гэж тооцоод Оюутолгойн гүний уурхайн олборлолт эрчимжиж улмаар тээврийн салбарын өсөлт нь эдийн засгийн өсөлтийг 1/3 орчмыг бүрдүүлнэ гэж дүгнэсэн юм.