ОХУ-ын Бүгд найрамдах Тува улсын филармонийн гоцлол дуучин Т.Цэцэндэлгэрийг тагнуулын хэргээр саатуулагдсан байж болзошгүй тухай "Медиазона" агентлаг мэдээллээ. Тус мэдээлэлд дурдсанаар Т.Цэцэндэлгэрийг энэ оны нэгдүгээр сарын 29-ний өдөр Москва хотын Лефортовскын тойргийн шүүхээс Эрүүгийн хуулийн 276-р зүйл тагнуул хийсэн хэргээр урьдчилан хорих төвд цагдан хорихоор шийдвэрлэсэн байна.

“Медиазона” сурвалжлах багийнхан Тува улсын филармонийн удирдлагуудаас энэ талаар тодруулахад “мэдээлэл байхгүй” гэж хэлээд утсаа тасалсан байна. Мөн түүнчлэн Москва дахь Монголын консулын газраас энэ талаар тодруулах гэсэн боловч мэдээлэл өгөхөөс татгалзжээ.  

Т.Цэцэндэлгэрийн “Инстаграм” хуудаст хамгийн сүүлд нэгдүгээр сарын 25-ны өдөр дүрс бичлэг орсноос хойш гурван сар гаруйн хугацаанд шинэчлэгдээгүй байна. Түүний “Инстаграм” хаяг 14.2 мянган дагагчтай.

“Медиазона” цахим хуудаст мэдээлснээр түүний эхнэр Элена Куулараас энэ тухай тодруулахад цагдан хорьсон тухай мэдээллийг эрс няцааж, “Нутагтаа ээж, аав дээрээ очсон, удахгүй холбогдоно” гэж хариулжээ. “Медиазона” сурвалжлах багийнхны олж мэдсэнээр Т.Цэцэндэлгэр болон Элена Куулар нар 2-р сарын 10-ны өдөр Кызыл хотод ардын урлагийн тоглолтод оролцох байсан боловч тодорхойгүй шалтгааны улмаас тухайн тоглолт цуцлагдсан байна.

Одоогоор хэргийн талаарх нарийн мэдээлэл тодорхой болоогүй байна. “Медиазона” цахим хуудасны мэдээллийг “Москва Таймс” эш татан мэдээлэхдээ “Хэрэв тагнуулын хэргээр шүүхээс 20 жилийн хорих ял оноож болзошгүй байна” гэжээ.  

Т.Цэцэндэлгэр гэж хэн бэ?

Тува улсын филармонийн цахим хуудаст байршсан Т.Цэцэндэлгэрийн намтарт дурдсанаар 1994 оны хоёрдугаар сарын 6-ны өдөр Увс аймгийн Зүүнговь суманд төрсөн. Тэрээр 2010 онд Кызыл хотын урлагийн коллежид элсэн суралцаж, 2014 онд дулаачийн ангийг амжилттай дүүргэжээ. Амжилтын хувьд Тува улсад болсон олон улсын дулаачдын уралдааны 2-р байр, Омск хотод болсон олон улсын видео шалгаруулалтад 2-р байрт жагсаж байсан. Т.Цэцэндэлгэр нь 2024 оны нэгдүгээр сард Бүгд найрамдах Тува улсын Соёлын яамны талархал хүртжээ.