УИХ-ын ээлжит сонгууль болохтой холбоотойгоор энэ сарын 29-ний өдрөөс эхлэн иргэдийн шилжилт хөдөлгөөнийг түр хугацаанд зогсоох гэж байна. Монгол Улсын Их Хурлын сонгуулийн тухай хуулийн 25.1 дэх хэсэгт “Иргэний шилжилт хөдөлгөөнийг санал авах өдрөөс 60 хоногийн өмнө зогсоож, санал авах өдрийн дараах өдрөөс сэргээнэ” гэж заасан байдаг. Хуульд заасны дагуу аливаа иргэн засаг захиргааны нэг нэгжээс нөгөөд шилжин суурьших хөдөлгөөний бүртгэл зогсох гэж байна.

Энэ талаар Нийслэлийн Улсын бүртгэлийн газрын дарга Г.Анхныбаяр хэлэхдээ “Бүртгэлийн байгууллага сонгуулийн хуулийн дагуу сонгогчийн нэрийн жагсаалтыг гардаг. Энэ дагуу энэ сарын 29-ний өдрөөс эхлэн иргэний шилжилт хөдөлгөөн зогсоно. Нийслэл хотод хаягийн бүртгэлтэй 1 сая 730 мянган иргэн байна” гэжээ.

Иргэд тухайн оршин суух хаягаасаа нүүсэн ч хасалтаа хийлгэдэггүйгээс давхардал үүсэх, бүртгэлийн алдаа гарах эрсдэл үүсдэг. Тиймээс оршин суух хаягаасаа нүүсэн, өөр газарт шилжин суурьшсан эсэхээ хуульд заасан хугацаанаас өмнө шалгахыг бүртгэлийн байгууллагаас анхаарууллаа.

Сонгогчдын нэрийн жагсаалтад бүртгэгдсэн эсэх болох сонгогчдын мэдээллийг https://election.burtgel.gov.mn/  цахим хуудаст хандан мэдээлэл авах боломж бүрджээ. Мөн түүнчлэн аливаа иргэний байнаг оршин суудаг хаяг дээр огт өөр хүн бүртгэгдсэн байвал УБЕГ-т өөрийн биеэр өргөдөл гаргах, эсхүл www.burtgel.gov.mn хаягаар хандаж шалгаж болох юм.