Монгол Улсын Шадар сайдын 2025 оны нэгдүгээр сарын 29-ний 13 дугаар тушаалын дагуу Стандарт, хэмжил зүйн газар, Мал эмнэлгийн ерөнхий газар, Үндэсний итгэмжлэлийн төв, Хүнсний аюулгүй байдлын үндэсний лавлагаа лаборатори хамтарсан хяналт шалгалтын ажлын хэсэг байгуулагдсан.

Тус ажлын хэсэг Монгол Улсын Шадар сайд С.Амарсайханд нийслэл хотын 6 зах, худалдааны төв, Булган, Орхон, Дархан-Уул, Сэлэнгэ, Архангай аймгийн томоохон зах худалдааны төв, сургууль, цэцэрлэгийн хоол үйлдвэрлэлийн газар, үр тарианы агуулах, хүнсний лабораториудад хяналт шалгалт хийсэн ажлын явцаа танилцууллаа.

Стандарт, хэмжил зүйн газар сорьцын хяналт, хэмжих хэрэгслийн хяналт шалгалт болон аж ахуйн нэгжийн жин хэмжүүр, үнэт эдлэлийн сорьцод хяналт шалгалтыг хийж, 140 шахам иргэн, аж ахуйн нэгжээс илэрсэн зөрчлийг газар дээр нь арилгуулж ажилласан байна.

Түүнчлэн Үнэт металл, эрдэнийн чулууны арилжаа эрхлэх тусгай зөвшөөрөлгүй, үнэт эдлэлийн худалдаанд ашиглаж байгаа электрон жингүүдийг шалгалт баталгаажуулалтад хамруулж, баталгаажуулаагүй, импортоор оруулж ирсэн үнэт эдлэлд сорьцын баталгааны тэмдэг даруулаагүй, стандартын шаардлага хангаагүй мөнгөн аяга худалдаалсан зэрэг зөрчлүүд илэрсэн байна.

Мөн Үндэсний итгэмжлэлийн төв зах худалдааны төвд худалдан борлуулж буй хүнсний бүтээгдэхүүн, түүхий мах нь холбогдох хууль, техникийн зохицуулалтын шаардлага хангаж буй эсэх, хяналтын лабораторийн чадавх, итгэмжлэгдсэн байдал зэрэгт хяналт шалгалт хийлээ.

Шалгалтаар Сэлэнгэ, Архангай, Орхон аймгийн худалдааны төвийн Мал эмнэлгийн ариун цэврийн лаборатори итгэмжлэлгүй, Лабораториуд шаардлагатай тоног төхөөрөмжөөр хангагдаагүй, Лабораторийн орчин нөхцөл стандартын шаардлага хангаагүй зөрчил илэрчээ.

Хүнсний Аюулгүй байдлын үндэсний лавлагаа лаборатори зах худалдааны төвүүдэд зарагдаж байгаа жимс, хүнсний ногоо болон хавар тариалахаар хадгалсан үр тариа, хүлэмжийн ногооноос нийт 242 дээж авч шинжилсэн байна. Жимс, хүнсний ногооноос 79 дээж авч түргэвчилсэн шинжилгээгээр шинжлэхэд 28 дээжид пестицидийн үлдэгдэл илэрсэн бөгөөд хиамны цехээс 22 дээж авч шинжлэхэд 8 дээж шаардлага хангаагүй буюу нитрит, давс, колиформ илэрсэн байна. Харин үр тарианы 20 дээжээс шинжилгээ авахад 12 нь шаардлага хангаагүй буюу хог ургамал, хөнөөлт шавж, хачиг илэрчээ.

Мөн Ерөнхий боловсролын сургууль, сургуулийн өмнөх боловсролын байгууллага болох цэцэрлэгийн хоол үйлдвэрлэлийн явц болон орчны эрүүл ахуйн халдвар хамгааллын дэглэмийн тандалт явууллаа. Тандалтаар сургууль, цэцэрлэгийн хүүхдийн хоолны чанар аюулгүй байдал, норм норматив, өдөрт авах илчлэг хэмжээ нь стандартын шаардлага хангаж байгаа эсэх, хоол үйлдвэрлэлийн орчны угаалга, цэвэрлэгээ, халдваргүйжүүлэлт нь эрүүл ахуй, халдвар хамгааллын дэглэмийг хангаж буйг тодорхойлох зорилгоор нэг ээлжинд бэлтгэсэн хоол болон ундны ус, агаар, арчдасны шинжилгээг хийсэн.

Монгол улсын Шадар сайд С.Амарсайхан хяналт шалгалтын үйл явцыг эрчимжүүлж, судалгаа шинжилгээтэй холбоотой хэд хэдэн асуудлыг нягтлан шалгах үүрэг чиглэл өглөө.

Цаашид хяналт шалгалтаар Говьсүмбэр, Дорноговь аймгийн хэмжээнд болон Замын-Үүд боомтоор орж ирж буй жимс, хүнсний ногооны пестицид болон нян бактериудыг лабораторийн түвшинд шинжлэн ажиллах юм. Мөн хүнсний аюулгүй байдлыг хангах хүрээнд Замын-Үүдийн гаалиар орж ирж буй мах, махан бүтээгдэхүүнд хяналт тавих юм.

Ташрамд хэлэхэд, Монгол Улсад одоогийн байдлаар 6670 гаруй стандарт хүчин төгөлдөр мөрдөгдөж байна. Үүний 10 хувь буюу ойролцоогоор 670 гаруй стандарт хүнсний чиглэлийн стандарт байгаа юм. Тиймээс эл чиглэлийн стандартын шинэчлэлт, хэрэгжилтэд онцгой анхаарах шаардлагатайг Стандарт, хэмжил зүйн газрын дарга С.Батбаатар онцоллоо.