Нидерландын Хаант улсын засгийн газар энэ сарын 9-ний өдөр хуралдаж Монгол Улстай агаарын харилцааны гэрээ байгуулах эрхийг Гадаад хэргийн яамандаа олгосон байна. Энэ хэлэлцээр нь Нидерландын европын хэсэгт хамаарах бөгөөд 1995 онд хоёр улсын хооронд мөрдөгдөж байсан гэрээг орлоно гэдгийг тус улсын Засгийн газрын цахим хуудаст тодотгожээ.

Өнгөрсөн 2024 оны аравдугаар сарын 22-ны өдөр Олон улсын иргэний нисэхийн байгууллагууын хуралдааны үеэр Иргэний нисэхийн ерөнхий газрын дарга Ч.Мөнхтуяа, Нидерландын Хаант улсын төлөөлөлтэй уулзсан юм. Энэ уулзалтаар Нидерландын Хаант улстай агаарын харилцааны хэлэлцээр байгуулах санамж бичигт гарын үсэг зурсан билээ.

Монгол Улс Нидерландын Хаант улсын хооронд агаарын харилцааны хэлэлцээрийг 1995 оны гуравдугаар сарын 09-ний өдөр байгуулж байсан түүхтэй юм. Ийнхүү тус улсын Засгийн газар энэхүү хэлэлцээрт гарын үсэг зурахыг хүлээн зөвшөөрснөөр хоёр улсын хооронд шууд нислэг үйлдэх эрх үүсэж байна.  

Хэлэлцээр шинэчлэн байгуулснаар олон улсын нислэгийн сүлжээг өргөжүүлж, улс хоорондын агаарын харилцааг сайжруулах, шинэ зах зээлд нэвтрэх, хоёр улсын худалдаа, эдийн засгийн салбарыг хөгжүүлэх, аялал жуулчлалын урсгалыг нэмэгдүүлэх чухал ач холбогдолтой юм.