Төрийн албаны зөвлөлөөс тогтоосны дагуу 2025 оны II улирлын ерөнхий шалгалтыг өнөөдөр орон даяар эхлүүллээ. 

Шалгалтыг тавдугаар сарын 21-26-нд ажлын дөрвөн авах юм. Өдөртөө таван ээлжээр, нэг ээлждээ 100 иргэн шалгалт өгөх боломжтой. Нийслэл дэх шалгалтыг Яармаг дахь нийслэлийн нутгийн захиргааны цогцолборт зохион байгуулж байна.

Төрийн албаны зөвлөлийн гишүүн бөгөөд төрийн албаны ерөнхий шалгалтыг зохион байгуулах төв комиссын дарга Д.Баатарсайхан, “Энэ удаагийн шалгалтад Улаанбаатар хотод 1854, улсын хэмжээнд 4106 иргэн бүртгүүлсэн. Мөн хөгжлийн бэрхшээлтэй иргэдийн шалгалт өгөх нөхцөлийг бүрдүүллээ. Шалгалт эхлэхээс 30 минутын өмнө ирэх ёстой. Хоцорсон тохиолдолд тухайн улирлынхаа дараагийн ээлжид ахин шалгалт өгөх боломжгүй. Иймд шалгалт өгч буй иргэд хариуцлагатай байхыг анхааруулж байна” гэв.

Төрийн албаны тухай хуулийн нэмэлт өөрчлөлтөөр төрийн албаны ерөнхий шалгалтыг улиралд нэгээс доошгүй удаа зохион байгуулахаар зохицуулсан байдаг. Энэ жилийн эхний улирлын төрийн албаны ерөнхий шалгалтад Улаанбаатар хотод 1681 иргэн бүртгүүлснээс 1195 нь шалгалт өгч, ерөнхий мэдлэгийн шалгалтад 625 (52 хувь), монгол хэл, бичгийн чадварын шалгалтад 531 (44 хувь), дүн шинжилгээ хийх чадварын шалгалтад 504 иргэн тус тус тэнцэж, 504 иргэн буюу 42,2 хувь нь нөөцөд бүртгэгдэх болзлыг хангажээ.