Ерөнхий сайдын хүүхэд тансаглав. Иргэдийн амьжиргаа бага байхад үнэтэй цүнх өгч, нисдэг тэргээр гэрлэх санал тавив. Удаж, удаж Ерөнхий сайд амралтын өдөр эв, хавгүй мэдэгдэл хийв. “Ялаа” гэж хорссон үгээр тодорхойлоод удалгүй энэ сарын 21-ний өдөр албан тушаалаа өгч байгаагаа зарлав. Хамтарсан Засгийн газрын бүх бурууг гэрээ зөрчсөн гэж үзэн Ардчилсан намд тохов. Одоо шинэ Засгийг хэн толгойлж, бүрэлдэхүүн ямар байх вэ гэдгийг чих тавин ажиглаж байна. Болж өнгөрсөн үйл явдлыг товч базвал ийм. Иргэд том сайдын тансаглалыг эсэргүүцэн тайвнаар жагсхад, сөргүүлээд нэг жагсаал бий болсон. Гэхдээ жагсаалын цаад агуулга, контекст нь ямар байгааг анзаарч харах ёстой. Харин өнөөдрийн сэдэв энэ биш болохоор гол асуудалдаа оръё. Монгол Улсад хаврын адаг сарын сүүлчээр өрнөсөн улс төрийн бужигнаан гаднын хэвлэлд хэрхэн тусав.

---

Арван сарын настай хамтарсан Засаг


АНУ-ын алдарт “Ассошейтэд Пресс” агентлаг ингэж дүгнэсэн. “Ерөнхий сайд огцрохыг шаардсан жагсаал ес хоног үргэлжилж байхтай зэрэгцээд 10 сарын настай хамтарсан Засгийн газар тарж байгаа бололтой” гэж нийтлэлийнхээ эхэнд тодотгожээ. Товч бөгөөд тодорхой илэрхийлэмж. Гэхдээ тэд Ардчилсан намыг хамтарсан Засгийн газраас гаргаж буйн цаад шалтгааныг “Ардчилсан намаас УИХ-д сонгогдсон залуу гишүүд Л.Оюун-Эрдэнийг огцруулах саналыг дэмжсэн нь хамтарсан засгийн газрын гэрээ зөрчсөн гэж буруутгасан” гэж дүгнэсэн байна.

Ерөнхий сайдын хүүгийн тансаглалаас үүдэн эсэргүүцлийн жагсаалыг залуучууд голдуу зохион байгуулж төв талбайд үргэлжилж байгааг онцолсон. Гэхдээ Орос, Хятадын дунд хавчуулан, далайд гарцгүй, байгалийн баялаг ихтэй улс гэдэг хэвшмэл ойлголт арилсангүй. Хүн амынх нь тэн хагас нь нийслэл хотдоо төвлөрсөн, ЗХУ задарсны дараа ардчиллын чиг баримжааг сонгосон гэдгээ ч мартсангүй.

АНУ-ын өөр нэг томоохон хэвлэл болох “Вашингтон Пост” сонин дээр дурдсан мэдээллийг “Ассошейтэд Пресс” агентлагийг эх сурвалжаа болгон бүрэн эхээр нь нийтэлжээ.

 

---

Сайдаа огцруулах эсэргүүцлийн жагсаал


Францын алдарт “Франц 24” цахим хуудас “Франц Пресс” агентлагийн мэдээллийг эш татан мэдээлжээ. Мэдээлэхдээ “Монголын залуучууд авлигын хэргээр Ерөнхий сайдаа огцрохыг шаардаж байна” гэж гарчиглажээ. Гэхдээ нэг догол мөрийг энд дурдахгүй өнгөрч болохгүй. Уг нийтлэлд “Монгол Улсад олон арван жилийн турш нүүрснээс олон орлогыг чинээлэг давхаргынхан завшдаг гэсэн ойлголт халдварт өвчин шиг өргөн тархсан бөгөөд эсэргүүцлийн жагсаал, эмх замбараагүй байдал үүсгэсээр ирсэн” гэсэн байна. За тэгээд араас Авлигын индексээр 2021 оноос хойш унаж байгааг гэдгийг дурдаад, Л.Оюун-Эрдэнийн хүүгийнх нь тансаглалыг ч онцолжээ.

Жагсаалыг залуучууд зохион байгуулж байгааг онцолж, зарим эх сурвалжийг ч онцгойлон дурдсан байна. Мэдээллийн тэнцвэрт байдлыг хадгалахын тулд эсрэг жагсаалын жагсагчдын үзэл бодлыг ч тусгажээ. Нэг ёсондоо Ерөнхий сайдыг эсэргүүцэж буй залуус, дэмжиж буй ахмад настнуудыг яриаг оруулсан нь “Ассошейтэд Пресс”-ээс ялгарч байлаа.

Анир үгүй

Бусад томоохон хэвлэлүүд Монголд өрнөж буй улс төрийн үйл явцыг мэдээлээгүй байна. “Ройтерс”, “Евро Ньюс”, “BBC”, “CNN” гэх хэвлэлүүд “таг”. Зарим хэвлэлүүд дөрөвдүгээр сараас хойш, бүр зарим нь 2024 оны есдүгээр сард Владимир Путиныг айлчилснаас хойш ямар ч мэдээлэл нэмж оруулаагүй байна.

Тэр ч бүү хэл хоёр хөршийн төрийн мэдлийн “ТАСС” болон “Синьхуа” агентлагууд ч улс төрийн бужигнаан хийгээд эрх мэдлийн шилжилтийн тухай мэдээлсэнгүй.