Дубай, Бахрайн, Казакстан, ОХУ гээд дэлхийн өнцөг булан бүрд үерийн аюул нүүрлэж, олон мянган хүний аж амьдрал хүндэрлээ. Казакстан, ОХУ-ын нутаг дамнасан үер өнгөрсөн өвөл хуримтлагдсан их хэмжээний мөс хайлснаас үүссэн бол Ойрх Дорнодын Арабын нэгдсэн Эмирт улсын Дубай хотод буусан үер аагим халуунтай тэмцэж, агаар чийгшүүлэх зорилгоор хиймэл бороо оруулснаас үүджээ. Үүл хуримтлуулах аргаар бороо оруулсан нь араасаа асар их хэмжээний аадар дагуулж, Дубай орчимд 80мм хүртэл хур тунадас унаж, онгоцны буудлуудын үйл ажиллагаа саатаж, хэдэн арван нислэг хойшлоход хүрчээ. АНЭУ-д жилд унах хур тунадасын хэмжээ 100мм байдаг бол ердөө 24 цагийн дотор жилийн дундаж үзүүлэлтийн 80%-тай тэнцэх хур тунадас унасан талаар орон нутгийн албаныхан мэдээлж байна.
Ойрх Дорнодод үүссэн үерийн гамшгийн зэрэгцээ асар хүчтэй шуурга дэгдэж, Оман, Бахрайн, АНЭУ болон Катарын зарим нутгийг хамарч 18 хүн амиа алдаж, хоёр хүн сураггүй болсон байна.
Уралын бүс, Сибирь орчим, тэр дундаа Тоболь голын ай савыг дагасан Томск, Оренбург, Курган мужид үерийн улмаас нөхцөл байдал хүндэрсээр байна. Казакстаны умард хэсэгт үер буусан ч ОХУ-тай харьцуулахад харьцангуй хохирол багатай гэнэ. Казакстаны умард хэсгийн Петропавловск хотод 1,000 гаруй орон сууц усанд автаж, 5,000 гаруй хүнийг тус бүсээс нүүлгэн шилжүүлсэн байна. Харин дөнгөж хилийн цаана орших ОХУ-ын Курган хотын орчим болон Оренбург хотод өнгөрсөн долоо хоногийн хугацаанд нийт 125,000 хүнийг гамшгийн бүсээс нүүлгэн шилжүүлж, аюулгүй газарт хүргэжээ. Үерийн улмаас төмөр зам урсаж, автозам тасарч цахилгаан эрчим хүчгүй болсон хэсэгт хүрч тусламж түгээхэд хүндрэлтэй байна. Мөн эдгээр хот нь тухайн бүсийн оршин суугчдын цахилгаан эрчим хүч, цэвэр усны эх үүсвэр, нөөц газрууд юм. Жишээ нь, Оренбург хотын ундны цэвэр усны нөөц үерт автаж, зэргэлдээх хотуудаас ундны ус зөөвөрлөж, орон нутгийн захиргаанаас гамшигт өртсөн иргэдийг хоол хүнсээр хангах болжээ.
Тоболь голын усны түвшин энэ нэмэгдсээр байвал дээр дурдсан ОХУ-ын гурван мужийн 800,000 хүн өртөх аюултай гэсэн анхааруулгыг мэргэжилтнүүд өглөө. Курган мужийн төв Курган хот ч үерийн аюулд өртөх нь тодорхой болсон тул урьдчилан сэргийлэх арга хэмжээг нэн яаралтай авч эхлэх зарилгийг тус хотын дарга Вадим Шумко гаргажээ.