Дэлхий даяар яг одоо зэсийн эрэлт өндөр байна. Тиймээс ч хоёр жилийн дээд түвшинд хүрч зэсийн ханш өссөн. Ер нь гуравдугаар сараас хойш өссөөр ийнхүү хоёр жилийн дээд түвшинд хүрсэн билээ. Гэвч ногоон бөгөөд цэвэр эрчим хүчинд шилжих хамгийн чухал түүхий эд болох зэсийн салбарын ирээдүй маш бүрхэг байна. Уур амьсгалын өөрчлөлтөөс үүдсэн ган ганчигт зэсийн салбар өртөх хамгийн эрсдэлтэй гэх тайлан мэдээлэл гарчээ. Уул уурхайн шинжилгээний PricewaterhouseCoopers байгууллагын тайланд дурдсанаар дэлхий даяар үйл ажиллагаа явуулж буй зэсийн уурхайн тал хувь нь 2050 он гэхэд уур амьсгалын өөрчлөлтөд өртөх төлөв ажиглагдсан байна. Түүнчлэн лити болон кобальтын салбарын 70-аас дээш хувь нь уур амьсгалын өөрчлөлтөд өртөнө гэж дүгнэжээ.

Зэсийн салбарт шинэ ордуудыг эрэн хайх, нээн илрүүлэхэд өртөг улам нэмэгдсээр байгаа. Үүний зэрэгцээ тухайн зэсийн орд бүхий газар орны иргэд байгаль орчин болон нийгмийн асуудлыг шийдэх шаардлага тавьж байгаа тул хөрөнгө оруулалт саатаж байгааг мэргэжилтнүүд онцолж байна. Хамгийн сүүлд л гэхэд Замбийн зэсийн уурхайн төсөл олон жил үргэлжилсэн ган гачигаас болж саатаад байгаа бол Чилийн бүс нутагт газрын гүний усны хомстол зэсийн төслүүдийн томоохон саад тотгор болоод байна. Дэлхийн даяар зэсийн үйлдвэрлэлийн талаас илүү хувийг Чили, Перу, Хятад гэсэн гурван улс бүрдүүлдэг. Уур амьсгалын өөрчлөлтөөс үүдэн Чили, Перу улсад усны хомстол нүүрлээд байгаа бол Хятадад цөлжилт хамгийн том саад учруулна гэж тайланд дурджээ.