“Хойд Венец”, “Цагаан шөнийн хот” хэмээн нэрлэгддэг Санкт-Петербург бол ОХУ-ын хоёр дахь том хот. Тус хот нь уран барилга, түүхэн дурсгалт газруудаараа дэлхийд алдартай. Нэрийн хувьд, "Гэгээн Петрийн хот" гэсэн утгатай бөгөөд хотыг үндэслэгч I Петрхааны нэрээр нэрлэжээ. Түүхэнд тэмдэглэгдснээр Санкт-Петербург хот 3 удаа нэрээ сольсон байна. 1914–1924 онд Петроград, 1924–1991 онд Ленинград гэж нэрлэгдэж байгаад 1991 онд анхны нэрээ эргүүлэн авчээ.

Тус хотод Орос улсын бахархал болсон олон алдартай музей, дэлхийн соёлын өвүүд бий. “Олон улсын тээвэр, логистикийн форум”-ын хүрээнд ОХУ-ын хамгийн алдартай музейнүүдийн нэг Санкт-Петербург хотод байрлах “Музей железных дорог России”-тай танилцаж, Оросын төмөр замын тээврийн түүхийг судлах өвөрмөц боломжийг олголоо.

Энэ музей нь Орос болон Европтоо хамгийн томд тооцогддог бөгөөд 1978 онд анх байгуулагдсан байна. Одоо энэ музей нь төмөр замын сэдэвтэй 45 мянга гаруй үзмэрийг сан хөмрөгтөө хадгалж байна. Үүний дотор 100 гаруй түүхэн галт тэрэг, вагон зэрэг бодит техникүүд багтдаг бөгөөд зочид тэдгээрийг ойроос үзэж, төмөр замын түүхэн хөгжлийн үе шаттай танилцах боломжийг олгож өгчээ.

Төмөр замын музей нь XIX зууны, 1850-иад онд баригдсан Петергофын төмөр замын хуучин депогийн барилгын цогцолборт байрлаж байгаа нь музейн түүхэн үнэ цэнийг улам бүр нэмэгдүүлдэг юм байна. 2017 онд Оросын төмөр замын 180 жилийн ойгоор энэхүү шинэ байршилдаа төвхнөж, үүд хаалгаа нээжээ.

Музейн хамгийн сонирхолтой, гол үзмэрүүд нь Оросын болон гадаадын анхны уурын зүтгүүрүүд, XX зууны эхэн үеийн уурын зүтгүүрийн сэргээн засварласан вагон загварууд байна. Мөн галт тэрэгний буудлуудыг чимэглэх зориулалттай гипсэн баримлууд, Орос болон гадаадын үйлдвэрүүдэд үйлдвэрлэсэн бяцхан галт тэрэгний загваруудын цуглуулга зэрэг олон сонирхолтой үзмэрүүдийг дэлгэжээ.

Хамгийн эртний үзмэр нь 1830-аад оны Царское Село төмөр замын зорчигч тээврийн вагон байна. Хамгийн урт үзмэр нь 50-70 метр урт зорчигч тээврийн галт тэрэг байна.