Хиймэл оюун түүнийг тойрсон технологийн асуудлууд нийтийн анхаарлыг татаад байгаа энэ цаг үед АНУ-ын томоохон их сургууль, коллежууд сургалтын хөтөлбөртөө хиймэл оюуны салбарыг багтааж эхэлжээ. Тухайлбал Пенсильванийн их сургууль ирэх намраас эхлэн бакалаврын хөтөлбөртөө заавал үзэх хичээлийн жагсаалтад багтаажээ. Ингэснээр тухайн сургуульд чухам аль ч чиглэлийг сонгон суралцсан хиймэл оюун ухааны талаарх ерөнхий ойлголт өгөх хичээл орох аж.

Энэ нь тийм ч шинэ үзэгдэл биш. Одоогоос зургаан жилийн өмнө 2018 онд АНУ-ын зарим сургуулиуд программ хангамжийн чиглэлээр суралцдаг оюутнуудын сургалтын хөтөлбөрт хиймэл оюуны салбар багтаж байжээ. Түүнчлэн Пурдюгийн их сургууль 2022 оны намраас эхлэн уг хичээлийг сургалтын хөтөлбөрт багтаасан байна.

Технологи, хиймэл оюуны чиглэлээр дагнан бичдэг indeed.com цахим хуудаст мэдээлснээр ажил олгогчид хиймэл оюуны анхан шатны мэдлэг шаарддаг болсон, түүнчлэн хиймэл оюуны хэрэглээг зохих түвшинд эзэмшсэн бол цалин нэмэгддэг тул сургалтын хөтөлбөрт багтах нэг шалтгаан болсон гэж мэдээлжээ. Жоржтауны их сургуулийн шинэ технологийн салбарын судалгаагаар АНУ-ын 10 гаруй сургууль хиймэл оюуны талаарх сургалтын хөтөлбөр боловсруулсан гэх дүн гарчээ.

Одоогоор тухайн сургуулиуд программ хангамжийн асуудал, хиймэл оюун гэж юу болох, түүнийг хэрхэн хэрэглэх зэргийг анхан шатны түвшинд зааж байгаа юм. Харин программ хангамжийн чиглэлээр суралцдаг оюутнууд илүү гүнзгий түвшинд суралцана гэсэн үг. Цаашлаад энэ чиглэлийн сургалтын хөтөлбөр томоохон их сургуулиудад ойрын гурван жилийн дотор бүрэн нэвтэрнэ гэж мэргэжилтнүүд таамаглаж байна.