УИХ-ын гишүүн, Эрүүл мэндийн сайд Т.Мөнхсайхан Эрүүл мэндийн яамны харьяа байгууллагууд, Аймаг, нийслэлийн эрүүл мэндийн газар, тэдгээрийн харьяа байгууллагуудын удирдлагуудтай салбарт тулгамдаж байгаа тодорхой асуудлаар уулзалт хийв.

Уулзалтын эхэнд Нийгмийн эрүүл мэндийн асуудал хариуцсан үндэсний төв буюу Өвчний хяналт, сэргийлэлтийн төв байгуулах тухай, манай улсын эрүүл мэндийн даатгалын нөхцөл байдал, тулгамдаж буй асуудлаар холбогдох албан тушаалтнууд танилцуулга хийж, эдгээр асуудлыг хэрхэн үр дүнтэй шийдвэрлэх талаар уулзалтад оролцогчид нээлттэй санал солилцлоо.

Сайд Т.Мөнхсайхан эрүүл мэндийн салбарт цаашид хэрэгжүүлэх үйл ажиллагаа, үндсэн чиглэл, түүнчлэн салбарт тулгамдаж байгаа асуудлуудын талаар танилцуулж, эрүүл мэндийн даатгалын сангийн он дамжсан өр төлбөр, түүнээс шалтгаалах тусламж үйлчилгээ тасалдах эрсдэл, байгууллагуудын бүтэц, үйл ажиллагааны оновчтой бус байдлаас шалтгаалсан тусламж үйлчилгээний тэгш бус хүртээмж, төвлөрөл, хүлээгдэл чирэгдэл, гадаад зээл тусламж, олон улсын байгууллагын санхүүжилтийн үр ашиггүй зарцуулалт зэргийг бууруулахад чиглэсэн бодлого, зохицуулалтыг эрчимтэй хэрэгжүүлэхээ илэрхийлэв.

Мөн салбарын бодлого, хэрэгжилтийн асуудалд шүүмжлэлтэй хандаж, үр дүнтэй шийдвэрлэхэд салбараараа идэвх санаачилгатай хамтран ажиллах шаардлагатай байгааг онцлов.

Түүнчлэн эрүүл мэндийн байгууллагуудын уялдаа холбоо сайжруулж, ажлын давхардал хийдлийг багасгах зорилгоор эрүүл мэндийн асуудалтай холбогдох бүх байгууллагуудын дунд уулзалт зөвлөгөөнийг тогтмол хийж байхаар тогтлоо гэж Эрүүл мэндийн яамнаас мэдээллээ.