ОХУ-ын нийслэл Москва хотын Басманный дүүргийн шүүх “Крокус Сити Холл” концертын танхимд алан хядах ажиллагаа явуулсан гэж үзэн дөрвөн этгээдийг баривчлах тогтоолыг уншиж сонордуулжээ. Дээрх дөрвөн этгээд нь Далержон Мирзоев, Саидакрами Мурадали Рачабализода, Шамсидин Фаридуни, Мухаммадсобир Файзов нар гэдэг юм байна. Үүнээс Мирзоев нь Тажикистан улсын харьяат бөгөөд гэм буруугаа хүлээжээ. Мөн Рачабализода ч мөн адил гэм буруугаа хүлээсэн байна.

Тэднийг тавдугаар сарын 22-ныг хүртэл саатуулах бөгөөд шүүх хурлыг тавдугаар сарын сүүл, зургаадугаар сарын эхээр зарлан хуралдуулах төлөвтэй байна. ОХУ-ын зарим хууль тогтоогчид бүгдийг нь цаазаар авах ёстой гэсэн уриалга дэвшүүлээд эхэлжээ.

Орон нутгийн цагаар өнгөрсөн баасан гарагийн орой Москва хотын хойд хэсэгт орших “Крокус Сити Холл” танхим руу 4 этгээд зэвсэглэн халдаж, “Пикник” хамтлагийн рок тоглолт үзэх гэж байсан 6000 гаруй хүн гал нээсэн юм. Оросын эрх баригчдын мэдээлснээр амиа алдагсдын тоо 137, хүнд шархадсан 100 гаруй хүн байгаа гэж мэдээлж байна. Халдлага гарснаас хэдхэн цагийн дараа “Исламын улс” бүлэглэл халдлагын хариуцлагыг хүлээсэн ч эцэслэн тогтоогдоогүй байна.

ОХУ-ын эрх баригчид дээрх этгээдүүд халдлага үйлдсэний дараа Украин руу гарахаар төлөвлөж байсан бөгөөд зарим талаар Украины талын оролцоо байж магадгүй гэж мэдээлж байна. Гэхдээ Украины зүгээс ОХУ-ын энэхүү мэдэгдэл нь үнэнээс маш хол, дэлхий нийтэд санаатай худал мэдээлэл тараасан гэж үзэж байгаагаа мэдэгдлээ.