Олон улсын эрүүгийн шүүх өнгөрсөн баасан гарагт хуралдаж Монгол Улсын давж заалдах хүсэлтийг хүлээж авахгүйгээр шийдвэрлэжээ. Монгол Улс нь ОХУ-ын Ерөнхийлөгч Владимир Путиныг айлчлах үеэр баривчлаагүй нь Олон улсын эрүүгийн шүүхийн дүрмийг зөрчсөн гэж үзээд байсан юм. Олон улсын эрүүгийн шүүх 10-р сард дээрх шийдвэрийг гарган Оролцогч орнуудын ассамблейд мэдүүлээд байсан билээ.

Улмаар энэ шийдвэрийг Монгол Улсын талаас эсэргүүцэн давж заалдан, хоёр шүүгчийн эрхийг хасах хүсэлт гаргаад байжээ. Олон улсын эрүүгийн шүүхээс манай талаас тавьсан хүсэлтийг “хэргийн үндэслэл болон хэрэг хянан шийдвэрлэх ажиллагааны асуудлаар гаргасан албан ёсны шүүхийн шийдвэр биш тул давж заалдах боломжгүй” гэж албан ёсны мэдэгдэлдээ дурджээ.

Олон улсын эрүүгийн шүүх 2023 оны гуравдугаар сард ОХУ-ын Ерөнхийлөгч Владимир Путиныг Украины эзлэгдсэн нутгаас хүүхдүүдийг хууль бусаар албадан гаргаж, ОХУ-ын нутагт дэвсгэрт хууль бусаар шилжүүлсэн гэж үзэн дайны гэмт хэрэгт буруутган баривчлах шийдвэр гаргасан билээ.

Монгол Улс ОУЭШ-ийн Ромын дүрмийг 1998 оны долоодугаар сарын 18-ны өдөр баталж, 2002 оны долоодугаар сарын 1-ний өдрөөс хүчин төгөлдөр үйлчилж эхэлсэн юм.