Алдарт Харри Поттер цувралын зохиолч Ж.К.Роулинг нийтийн сүлжээнд оруулсан нийтлэлээсээ болж, бэлгийн цөөнх гэж үздэг трансжендерүүдийн шүүмжлэлд өртөж, Шотландын цагдаагийн газарт цөөнгүй гомдол ирснийг холбогдох хүмүүс нь шалгажээ. Шотландын цагдаагийн газраас хатагтай Роулинг нь 2021 оноос хэрэгжиж эхэлсэн “Үзэн ядах гэмт хэрэг ба Нийтийн хэв журмын акц”-ыг зөрчөөгүй. Гомдол мэдүүлэгсдийн тайлбарлаж байгаачлан түүний “Х” сүлжээнд оруулсан нийтлэл “нийтийн дунд үзэн ядах үзэл түгээсэн” гэх заалтад харшилсан зүйл үгүй гэж үзсэн тул хуулийн хариуцлага тооцохгүй хэмээн мэдэгджээ. Тэрбээр трансжендер эмэгтэйчүүдийг “эрэгтэй” гэж бичсэний улмаас бусдыг ялгаварлан гадуурхаж, түүнийгээ олон нийтэд түгээсэн гэх шүүмжлэл хүртсэн юм.

Мөн Их Британийн Ерөнхий сайд Риши Сунак алдартай зохиолчийн үзэл бодлоо илэрхийлснийг дэмжиж, хүн биологийн тал дээр хувийн байр сууриа илэрхийлсний төлөө гэмт хэрэгтэн болох учиргүй гэж өмгөөлжээ. Р.Сунак цааш нь ярихдаа “Их Британи бол үг хэлэх эрх чөлөөг эрхэмлэдэг улс. Манай намын зүгээс ч эрх чөлөөг хэзээд хамгаална” гэв. Үзэн ядах гэмт хэрэг ба Нийтийн хэв журмын акц хэрэгжиж эхэлснээс хойш Шотландын цагдаагийн газарт 3000 гаруй гомдол ирээд байгаа юм байна.