Одоогоос долоон жилийн дараа 2032 оны арванхоёрдугаар сарын 22-нд дэлхийг мөргөх магадлалтай солирыг одон орончид ажиглалтад авчээ. Энэхүү магадлал нь 1%-иас их байгаа юм. Хэдийгээр энэ нь өчүүхэн бага магадлал мэт боловч дэлхийг мөргөж мэдэх бусад солирынхтой харьцуулахад хамаагүй өндөр хувь хэмжээ гэсэн үг.

Олон улсын анхаарал хандуулах солирын сүлжээ гэх байгууллага 2013 онд байгуулагджээ. Энэ нь алс хэтдээ дэлхийд аюул занал учруулах, дэлхийн тойрог замтай ойр өнгөрөх магадлал бүхий солируудыг тогтоож эрдэмтдийн дундын сүлжээнд байршуулах зорилгтой сүлжээ юм. Уг сүлжээнд 2024 онд YR4 нэртэй нэгэн солир анхаарал тааж эхэлжээ. Нэгдүгээр сарын дундуур эрдэмтэд уг солир дэлхийг мөргөх магадлал 1.3% гэж таамаглаж байсан бол хоёрдугаар сарын эхээр энэ тоо 1.6% болж нэмэгджээ. Цаашид ч нэмэгдэж ч болно, бүр эсвэл 0-ийг зааж ч болно гэдгийг эрдэмтэд онцолж байна.

“Энэ солирыг нүднээс салгалгүй анхааралтай ажиглахын тулд бидэнд маш том телескоп хэрэгтэй. Дөрөвдүгээр сар хүртэл бидэнд дахиад хоёрхон сар байна. Бидний нүдэнд дахиж харагдах хүртэл 2028 оныг хүлээх хэрэгтэй” гэж АНУ-ын Сансар судлалын агентлагын Дэлхийн ойролцоох биетийг судлах нэгжийн захирал Пол Чодас мэдэгджээ.

Уг солирын дэлхийд аюул учруулж болохыг Ториногийн шатлалаар 0-10-ын хооронд эрэмбэлэхэд гурвыг заана гэдгийг эрдэмтэд хэллээ. Хөлбөмбөгийн талбайн хэмжээтэй энэ солир дэлхийг мөргөх магадлал 63-т нэг. Цаашид тойрог зам болон гулзайлтаас шалтгаалж бүр онохгүй өнгөрч болно.

Хамгийн сүүлд үүнтэй төстэй солир 2004 онд ажиглагдаж байжээ. Апофис нэртэй уг солир хөлөг онгоц хэмжээтэй бөгөөд дэлхийг мөргөх магадлал 2.7% байлаа. Одон орончдын тооцоолсноор 2029 онд мөргөх магадлалтай. Магадлалын хувь буурсаар одоо 0-тэй дөхөж очоод байна.