АНУ болон ОХУ-ын төрийн тэргүүн нар утсаар холбогдох үеэр хоёр тал Украины эрчим хүчний байгууламжид 30 хоногийн хугацаанд довтлохгүй байх дээр тохиролцлоо. Хэдийгээр АНУ-ын зүгээс 30 хоногийн хугацаанд галын шугам дээр гал зогсоох саналтай байсан ч ийнхүү хэсэгчилж “гал зогсоох” тохиролцоонд хүрчээ.

ОХУ-ын төрийн мэдлийн “ТАСС” агентлагийн мэдээлэлд дурдсанаар АНУ, ОХУ-ын тал урт хугацаанд гал зогсоох тал дээр байр суурь нэгтэй байгаа гэдгийг онцлоод, ОХУ-ын ашиг сонирхлыг тэргүүнд тавина гэжээ.

АНУ-ОХУ-ын төрийн тэргүүн нар утсаар холбогдсоны дараа Украины Ерөнхийлөгч Владимир Зеленьский Их Британи, Франц, Герман зэрэг улсын удирдагчидтай холбогдож цаг үеийн нөхцөл байдлын талаар ярилцжээ. Мөн барууны зарим хэвлэлүүд ОХУ амлалтаа зөрчихийг үгүйсгэхгүй гэж мэдээлж байна.