Дэлхийн шинжлэх ухааны томоохон хэвлэлүүдээс аваад дэлхийн томоохон хэвлэл мэдээллийн хэрэгслүүд одоогоос хоёр хоногийн өмнөөс нэгэн сэдвийг онцлов. Монголын говиос олдсон өвөрмөц хоёр хуруу бүхий сарвуутай, үлэг гүрвэлийн нэн шинэ төрөл зүйлийн тухай сэдэв байсан юм. Цэрдийн галавын сүүл үед хамаарах теризинозаврын бүлэгт багтах өвөрмөрц хоёр хумс бүхий, хүчирхэг сарвуутай нэн шинэ төрөл зүйл гэж гаднын эрдэмтэд шагшиж байна. Өмнө нь хоёр хумс бүхий том сарвуу олдож байгаагүй юм. Олдворын байдлаас харвал дунд зэргийн хэмжээтэй, 260 орчим кг жинтэй болохыг тогтоожээ. Гаднын эрдэмтдийн үзэж байгаачлан урт, муруй хумс нь хүчтэй нугалах булчингийн тогтолцоотой, өндөрт ургасан ургамлыг хүчтэй барихаар зохицсон гэж дүгнэж байна. Бараг фут орчмын урттай сарвуунууд нь доод яснаас хамаагүй том байсан нь судалгаагаар тогтоогдсон.

Өнөө цагт дэлхий нийт гайхаад байгаа энэ олдвор 2012 онд Өмнөговь аймгийн Ханбогд сумын нутаг Баянширээ палеотолонгийн тогтоцоос олджээ. Улмаар шинжлэх ухааны нэршлийг нь “Duonychus tsogtbaatari” гэж Монголын палеонтологич Х.Цогтбаатарын нэрээр нэрлэсэн байна. Шинжилгээгээр Баянширээгээс олдсон өвөрмөц сарвуу нь 90-100 сая орчим жилийн өмнөх болохыг тогтоожээ. "Дуонихус" гэх нэршлийг Японы эрдэмтэн Кобаяши тэргүүтэй эрдэмтэд энэ оны эхээр сонгосон юм. "Дуо" нь латин хэлний хоёр, "онихус" нь эртний грек хэлний "хумс" гэсэн үг аж. Шинжлэх ухаанд нэн шинэ олдвор учраас олон улсын эрдэмтэд яг одоо энэ шинэ олдвор дээр төвлөрч байна. 

Теризинозаврууд нь 145-66 сая жилийн өмнө буюу цэрдийн галавын сүүл үед одоогийн Ази, Хойд Америкт ноёлж байсан өвсөн тэжээл болон холимог идэшт үлэг гүрвэлийн нэг юм. Өмнө нь энэ төрлийн үлэг гүрвэл ихэвчлэн гурван хуруутай олдож байсан бөгөөд Баянширээгээс олдсон хоёр хуруутай сарвуу нь энэ төрлийн анхных нь юм.

НҮБ-ын Боловсрол, шинжлэх ухаан, соёлын байгууллага буюу ЮНЕСКО Монголын говийг дэлхийн үлэг гүрвэлийн олдворын ад биш баян сан гэж дүгнэдэг. Чухамдаа яг энэ бүсээс үлг гүрвэлийн хувьслын эцсийн үе шат болох Цэрдийн галавын хожуу үеийн олдворын онцгой чухал эх сурвалж гэж BBC агентлаг тодотгожээ.

Ташрамд дурдахад их говиос үлэг гүрвэлийн сарвуу олдож байгаа нь анхных биш. Хамгийн анх 1965 онд Өмнөговь аймгийн Гурвантэс сумын нутаг Нэмэгтийн хөндийгөөс “дейнохерос”-ын урд сарвуу, гартайгаа олдож байлаа. Тухайн үед дейнохеросын энэ төрлийн олдвор олдож байгаагүй бөгөөд үлэг гүрвэлийн нэн шинэ олдвор гэж дүгнэсэн. Улмаар эхний нээлтээс 40 жилийн дараа 2009 онд “дейнохерос”-ын бүтэн олдвор олдож палеонтологийн шинжлэх ухаанд нэн шинэ төрөл зүйлээр бүртгэсэн билээ.