Ургамлын эрүүл мэндийг хамгаалах замаар ургамал, ургамлын гаралтай бүтээгдэхүүнээс үүсэх эрсдэлийг бууруулж, аюулгүй байдлыг хангах, хөдөө аж ахуйн үйлдвэрлэлийн бүтээмжийг нэмэгдүүлэх, байгалийн тэнцвэрийг хадгалах, олон улсын чөлөөт худалдааг дэмжих чиг үүрэг бүхий Ургамал хамгааллын газар Дархан -Уул аймагт байгуулагдан үйл ажиллагаагаа эхлүүлээд байна.

Манай улс Нэгдсэн үндэсний Байгууллагын Хүнс, хөдөө аж ахуйн байгууллагаас 1951 онд баталсан “Ургамал хамгааллын олон улсын конвенци”-д 1997 оны 11 сард нэгдэн орсон бөгөөд тус конвенцид нийт 185 улс нэгдээд байна.

Ургамал, ургамлын гаралтай түүхий эд, таримлын нэр төрөл, шинэ сорт, шинэ зүйлийн тоо хэмжээ жилээс жилд нэмэгдэж байгаатай холбоотой манай улсад тархалтгүй гадаад, дотоод хорио цээртэй хөнөөлт организм нэвтрэн орох, тархах, түүний нөлөөгөөр байгалийн болон таримал ургамлын нэр төрөл, ургацын чанар, тоо хэмжээ буурах, таримлын пестицидийн хэрэглээ нэмэгдэх улмаар эдийн засаг, хүнсний аюулгүй байдалд сөргөөр нөлөөлөх эрсдэл нэмэгдэж байна.

Иймд дэлхийн улс орон бүр өөрийн орны байгалийн болон таримал ургамлын төрөл зүйлийг хамгаалах үүднээс ургамал хамгааллын олон улсын гэрээ, конвенци болон ургамал хамгааллын цогц арга хэмжээ, хөнөөлт организмын тархалтын тандан судалгаа, хөнөөлт организмын эрсдэлийн шинжилгээ, пестицидийн нэгдсэн менежментийг нэвтрүүлэх замаар ургамал, ургамлын гаралтай түүхий эдийн чанар, аюулгүй байдлын шаардлагыг хангуулж байна.

Ургамлын эрүүл ахуйн арга хэмжээний олон улсын стандартуудыг хэрэгжүүлснээр өөрийн орны байгалийн болон таримал ургамлыг эрсдэлээс хамгаалах, түүхий эд, бараа  бүтээгдэхүүний дотоод, гадаад хорио цээр, импорт, экспортод тавих шаардлагууд хангагдах бөгөөд түүгээр дамжуулан импортлогч орнуудын шаардлагыг хангасан түүхий эд бүтээгдэхүүнийг импортлох, экспортлох нөхцөлүүд бүрдэх юм.

Ургамал хамгааллын газар байгуулагдсанаар дэлхийн 185 гишүүн оронтой ургамал хамгаалал, хорио цээрийн салбарт хамтран ажиллах гэрээ, протокол, хэлэлцээр байгуулах нөхцөл бүрдэж, ургамал, ургамлын гаралтай бараа бүтээгдэхүүний гадаад худалдаанд учрах саад тотгорыг бууруулах, экспорт, импортын хорио цээрийн нөхцөл шаардлагыг хангах, өөрийн орны дотоод, гадаад хорио цээрийг хангуулах олон улсад хүлээсэн үүргээ биелүүлэх, хүлээн зөвшөөрөгдсөн эрхээр хангагдах эрх зүйн орчин бүрдсэн юм.

Ургамлын эрүүл мэндийн салбарын хууль тогтоомж, Засгийн газрын шийдвэрийн хэрэгжилтийг хангах, олон нийттэй харилцах, бүтцийн дотоод зохицуулалт, үйлчилгээг эрхлэх, хүний нөөцийн бодлогыг төлөвлөн хэрэгжүүлж, салбарын хууль эрх зүйн орчинг боловсронгуй болгох, гадаад хамтын ажиллагааг хөгжүүлэхэд бүх талын дэмжлэг үзүүлэх, ургамлын эрүүл мэндийг хамгаалах, ургамлын хөнөөлт организмын гаралт, тархалтаас сэргийлэх, түүнтэй тэмцэх, устгах үйл ажиллагааг улсын болон орон нутгийн хэмжээнд удирдан зохион байгуулах, ургамал хамгааллын бүтээгдэхүүний зохистой хэрэглээг хангах, салбарт оролцогч талуудыг мэдээ, мэдээллээр хангаж, мэргэжил арга зүйн дэмжлэг үзүүлэн, ургамлын гаралтай бүтээгдэхүүний эрүүл ахуй, хорио цээрийн нөхцөл, шаардлагыг хангуулах  мэдээлэл, зөвлөгөө өгч дэмжлэг үзүүлэн ажиллана.