Украины Ерөнхийлөгч Владимир Зеленьский ОХУ-ын Ерөнхийлөгчийн тавьсан саналыг нааштайгаар хүлээн авч байгаагаа мэдэгдээд “Энэ удаад Путин ямар нэгэн шалтаг хайхгүй гэж найдаж байна” гэжээ.

ОХУ-ын Ерөнхийлөгч Владимир Путин Ялалтын баярын цэргийн жагсаалын дараа мэдэгдэл хийж Туркийн Истанбул хотноо Украины асуудлаар хэлэлцээ хийх санал тавьсан юм. Энэхүү яриа хэлэлцээ нь гуравдагч этгээдийн ямар нэгэн тулгалтгүйгээр, мөргөлдөөний үндсэн шалтгааныг тогтоож, олон жил үргэлжилсэн сөргөлдөөнийг арилгахад чиглэх ёстой гэж Владимир Путин үзэж байгаа юм.

Украины хувьд дайны ажиллагаа эхэлсэн цагаас Оросын хяналт тогтсон газар нутаг тэр ч бүү хэл Крымийг буцаан өгвөл дайныг дуусгахад бэлэн гэдгээ илэрхийлдэг. Харин ОХУ-ын хувьд яг одоогийн нөхцөл байдлаар хилээ тогтоож, урт хугацаанд энхийн хэлэлцээ байгуулах байр суурийг баримталдаг юм. Гэвч АНУ болон барууны хэд, хэдэн улс Украины газар нутгийг өргөргөөр нь хувааж умард болон өмнөд гэж хуваан, цэрэггүй бүс тогтоон асуудлыг энхийн замаар шийдвэрлэх ёстой гэсэн байр суурьтай байдаг билээ.