Их эзэн Чингис хаан хан цолонд өргөмжлөгдсөн, анхны Их хуралдай хурж, Их Монгол Улсын гал голомтыг бадраасан түүхэн дурсгалт газар болох Хэнтий аймгийн Биндэр суманд байрлах есөн хөлт цагаан тугийн бэлгэдэлт Монгол төрийн "Их Хуралдай" орд өргөөг 2025 оны 6 дугаар сарын 22-ны өдөр нээж, үйл ажиллагааг нь эхлүүллээ.

Түүхэн аялал жуулчлалын хөгжилд үнэтэй хувь нэмэр оруулах "Их Хуралдай" цогцолборын нээлтэд Чингис хаан Үндэсний музейн удирдлагууд, Хэнтий аймаг, Биндэр сумын албаны төлөөллүүд болон нутгийн зон олон оролцов.

Их Хуралдай цогцолборыг түүхэн сурвалж бичиг, эрдэмтэн судлаачдын бүтээлд тулгуурлан Засгийн газрын шийдвэрээр, улсын төсвийн хөрөнгө оруулалтаар Хэнтий аймгийн Биндэр сумын нутагт орших Онон Хурхын бэлчирт байгалийн унаган төрх, газар зүйн онцлогт зохицуулан Цагаан нуурын ойролцоо бүтээн байгуулжээ.

Уг цогцолборт Чингис хааны байгуулсан төрийн сүлд шүтээн болох есөн хөлт Цагаан туг, Их хааны ургийн наран тамга, Гүег хааны тамганы дардас, Их Хуралдай хуралдах үеийн хаад, язгууртнуудын ордонд байрлан суух дэг ёсыг харуулсан зохиомж бүхий исэр сандал, туг хиур, хүндэтгэлийн орон зайг бий болгожээ. Мөн хаалга бүрийн дотор Монголын Нууц Товчоо, Шар тууж, Асрагч нэртийн түүх зэрэг түүхэн эх сурвалжийн эшлэлийг монгол бичгээр бичиж, цогцолборт нэг ч хадаас оруулалгүй углуургадаж бүтээсэн ба үндэсний болоод орчин үеийн шийдлийг хослуулсан аж.

Цогцолборын барилгыг “Мөнх-Өргөө” ХХК, барилгын интерьер, дотоод уран сийлбэр шинэчлэл, гадна цахилгаан хангамжийг “Хангайн цагаан чулуу” ХХК, барилгын зоорины ажил, гадна тохижилт, шугам сүлжээг “Мөнх-Өргөө” ХХК, “Нутгийн баруун мод” ХХК хамтран гүйцэтгэв.