Монгол Улсын Ерөнхийлөгч У.Хүрэлсүх санаачилж, Хүнс, хөдөө аж ахуй, яамнаас хэрэгжүүлж буй хүнсний хангамж, аюулгүй байдлыг хангах “Хүнсний хувьсгал” хөтөлбөрийн үр дүнд 53 үйлдвэр шинээр бий болж байгаа нэг нь “Жүр үр” ХХК-ийн олон улсын стандартыг хангасан шинэ үйлдвэр билээ.

Тус үйлдвэрийн нээлт 2025.09.26-ны өдөр болж, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн, ХүҮБХЗГ-ын дарга Д.Довчинсүрэн тэргүүтэй төлөөлөгчид оролцон, үйлдвэрийн үйл ажиллагаатай танилцлаа.

Төрийн нарийн бичгийн дарга Т.Жамбалцэрэн нээлтийн ёслолд хэлсэн үгэндээ, “Монгол Улсын хүнс, хөдөө аж ахуй, хөнгөн үйлдвэрийн салбарт технологийн дэвшил бүхий евро стандартын нэгэн шинэ үйлдвэр нээлтээ хийж байна. Энэ бол “Жүр үр” компанийн хамт олны 27 жилийн уйгагүй хөдөлмөрийн үр дүн, 1200 гаруй ажилчдынх нь хичээл зүтгэлийн илэрхийлэл гэж харж байна. Монгол Улсын Засгийн газрын хүн амаа эрүүл, аюулгүй хүнсээр хангах бодлогыг гүйцэтгэж буй үндэсний томоохон үйлдвэрлэгч олон улсын стандартаар үйлдвэрлэлийн хүчин чадлаа өсгөн нэмэгдүүлж буйд талархал илэрхийлье. Монгол Улсын Ерөнхийлөгч санаачлан, 2022 оноос хэрэгжиж эхэлсэн “Хүнсний хангамж, аюулгүй байдал” хөтөлбөрт 3000 орчим иргэн, аж ахуйн нэгж хамрагдан, үр шимийг нь түгээж, 53 үйлдвэр шинээр бий болж байна. Монгол Улсын ДНБ 2025 оны эхний хагас жилд 5.6 хувийн өсөлт үзүүлсний 3.6 хувийг хүнс, хөдөө аж ахуй, хөнгөн үйлдвэрийн салбар дангаараа бүдүүллээ. Хөдөө аж ахуйн үйлдвэрлэл богино хугацаанд ийм өндөр өсөлт үзүүлсэн нь “Хүнсний хувьсгал” хөтөлбөрийн хэрхэн хэрэгжиж буйг илтгэж байна. Нөгөө талдаа энэ салбарт ажиллаж буй баялаг бүтээгчдийн гавьяа” гэдгийг онцлон тэмдэглэлээ.

“Жүр Үр” ХХК-ийн шинэ үйлдвэр нь олон улсын GMP, GHP стандартын шаардлагад нийцсэн. Хүнсний үйлдвэрийн стандартаар 7 давхар буюу 12 давхар орон сууцны барилгатай дүйцэх өндөр, нийт 10,000 ам.метр талбайтай. Тоног төхөөрөмжүүд нь Герман, Нидерланд, Итали, Испани зэрэг Европын орнуудын жишигт нийцэж буй. Хүнсний аюулгүй байдал, чанар, стандартыг хангасан хамгийн сүүлийн үеийн технологийг нэвтрүүлж үйлдвэрлэлийн бүтээмжийг 2-4 дахин нэмэгдүүлэн, хүчин чадлыг 50-200 хувиар өсгөх боломж бүрдлээ. Улс орны аюулгүй байдлын баталгааны нэг чухал хэсэг нь хүнсний хангамж, аюулгүй байдал. Ийнхүү шинэ үйлдвэрээ нээснээр хүнсний бүтээгдэхүүнээ дотооддоо үйлдвэрлэж, чанар, эрүүл ахуйн ахуйн шаардлага хангасан бүтээгдэхүүнийг шинэхнээр нь хэрэглэгчдэдээ хүргэх компанийн бодлого улам бүр бататгаж чадлаа гэдгийг тус компанийн ерөнхий захирал Б.Мөнхзул онцоллоо.