Улаанбаатар хотын дэд бүтцийн хөгжилд шинэ үеийг эхлүүлэх “Улаанбаатар метро” төсөл нь нийтийн тээврийн тогтолцоог орчин үеийн түвшинд хүргэж, байгаль орчин, нийгмийн тогтвортой хөгжлийг дэмжихэд чиглэж байна.

Төслийн хэрэгжилтээр их багтаамжтай тээврийн шинэ төрөл түшиглэсэн хотын хөгжлийн цогц загвар бий болох бөгөөд ингэснээр авто замын түгжрэлийг бууруулах төдийгүй өртөө орчмын хөгжилд тулгуурлан ажлын байр шинээр бий болгох, иргэдийн амьдрах орчны чанарыг дээшлүүлэх зэрэг нийгэм болон эдийн засгийн олон талын үр өгөөжийг авчрах болно.

"Улаанбаатар метро" төслийн байгаль орчин, нийгмийн тогтвортой байдлыг хангах зорилгоор Монгол Улсын “Байгаль орчинд нөлөөлөх байдлын үнэлгээний тухай” хууль болон олон улсын стандартад нийцүүлэн Байгаль орчин, нийгмийн нөлөөллийн үнэлгээ (ESIA)-г Бүгд Найрамдах Солонгос Улсын “Иножен” ХХК болон Монгол Улсын “Эко Натур” ХХК гүйцэтгэж байна. Түүнчлэн төслийн оролцогч талуудыг тодорхойлох хүрээнд нийгэм-эдийн засгийн судалгааны ажил үргэлжилж байна. Нийт 5 дүүргийн 48 хороонд иргэд, нийтийн уулзалтыг зохион байгуулснаас гадна төрийн болон төрийн бус байгууллага, жижиг, дунд бизнес эрхлэгчид, салбарын эрдэмтэн судлаачид, орон нутгийн томоохон төсөл хөгжүүлэгчдийн төлөөлөлтэй уулзалт хийж саналыг тусган ажиллаад байна. 

Одоогийн байдлаар үнэлгээний ажил 82.5 хувийн гүйцэтгэлтэй үргэлжилж байна. Тус байгаль орчин, нийгмийн нөлөөллийн үнэлгээний тайланд тодорхойлж хамгааллын бодлогын хүрээнд боловсруулсан менежментийн төлөвлөгөөний дагуу төслийн бүтээн байгуулалтын болон ашиглалтын үеийн байгаль орчин, нийгэмд үзүүлэх эрсдлийг бууруулах, хяналт тавьж ажиллах юм.

“Улаанбаатар метро” төсөл нь Энхтайваны өргөн чөлөө дагуу Толгойтоос Амгалан чиглэлд 19.4 км, 15 өртөө болон засвар үйлчилгээний депотой байхаар төлөвлөгдсөн. Төсөл хэрэгжснээр 2030 оны түвшинд оргил цагт нэг чиглэлд цагт 17,206 зорчигч тээвэрлэх бөгөөд авто замын хөдөлгөөний эрчим 10 хувиар дундаж хурд 23.3 хувиар өсөх тооцоо гарсан.

“Улаанбаатар метро” төсөл нь зөвхөн нийтийн тээврийн шинэ хэлбэрийг нэвтрүүлэхээс гадна хотын хөгжлийн бүтцэд шинэ хандлагыг авчирч, иргэдийн амьдралын чанарыг дээшлүүлэхэд чухал хувь нэмэр оруулах юм.