Монгол Улсад хөнгөн үйлдвэрийн салбарын технологийн шинэчлэл, инновацийн үнэлгээний чадавхыг бэхжүүлэх хүрээнд Технологи дамжуулах тухай хуулийн 6 дугаар зүйлийн 6.1.2, мөн “Хүнд болон хөнгөн үйлдвэрлэлийн технологийн түвшний үнэлгээ хийх байгууллагад эрх олгох журам”-ын дагуу Эдийн засаг, хөгжлийн сайд болон Хүнс, хөдөө аж ахуй, хөнгөн үйлдвэрийн сайдын 2025 оны аравдугаар сарын 31-ний өдрийн А/53, А/521 дугаар хамтарсан тушаалаар “Хүнс, хөдөө аж ахуй, хөнгөн үйлдвэрийн судалгаа хөгжлийн төв” улсын төсөвт үйлдвэрийн газарт “Хөнгөн үйлдвэрлэлийн технологийн түвшний үнэлгээ хийх эрх”-ийг гурван жилийн хугацаатай олголоо.

Энэхүү эрх нь хөнгөн үйлдвэрийн салбарт үйл ажиллагаа явуулж буй аж ахуйн нэгж, байгууллагын хэрэглэж буй тоног төхөөрөмж, үйлдвэрлэлийн технологийн түвшин, үр ашиг, инновацийн чадварыг мэргэжлийн түвшинд үнэлэх, сайжруулах боломжийг нээж байгаа юм.

“Хүнс, хөдөө аж ахуй, хөнгөн үйлдвэрийн судалгаа хөгжлийн төв” нь сүүлийн жилүүдэд хөнгөн үйлдвэрлэлийн чиглэлээр технологийн дүн шинжилгээ, судалгаа, инновацийн үнэлгээний ажлыг тогтвортой гүйцэтгэж ирсэн туршлагатай байгууллага бөгөөд уг эрх олголтоор салбарын технологийн үнэлгээ, судалгааг хууль ёсны үндсэн дээр, бие даан хэрэгжүүлэх бүрэн боломжтой боллоо.

Цаашид тус төвөөс хөнгөн үйлдвэрийн салбарын үйлдвэр, компаниудын технологийн хүчин чадлыг тодорхойлох, сайжруулалтын зөвлөмж гаргах, шинэ технологи нутагшуулахад дэмжлэг үзүүлэх ажлыг шат дараатай хэрэгжүүлэхээр төлөвлөж байна.

Энэхүү алхам нь хөнгөн үйлдвэрлэлийн салбарын хөгжил, өрсөлдөх чадварыг нэмэгдүүлэх, технологийн дэвшилд тулгуурласан үйлдвэрлэл, экспортын өсөлтийг хангах чиглэлд чухал түлхэц өгөх юм.