МҮБХ-ноос "Сайн үйлсийн аян”-г дэмжих ажлын хүрээнд Эх хүүхдийн эрүүл мэндийн үндэсний төвтэй хамтран зохион байгуулсан улс, аймаг, цэрэг, сумын цолтой 256 бөхийн Эх хүүхдийн эрүүл мэндийн төлөөх хандивын барилдаанд Баянхонгор аймгийн Жинст сумын харьяат, "Алдар" спорт хороо, Эм Си Эс групп, Богд банк, Хос Хаш Оюу ХХК, Гал Хонгор ХХК, Тэргүүн Богд дэвжээний бөх, улсын арслан Энхтүвшиний Батмагнай түрүүлж, Хөвсгөл аймгийн Их-Уул сумын харьяат, "Сүлд" спорт хороо, ШШГЕГ 461-р анги, Импро групп, Зорчигч Тээвэр 1 ОНӨААТҮГ, "Хөвсгөлийн Хүчтэн" дэвжээний бөх, улсын начин Батбаярын Даваа-Очир үзүүрлэв.

Дөрөвт Завхан аймгийн Нөмрөг сумын харьяат, "Хилчин" спорт хороо, ХЦ-0208 анги, Алтангадас ХХК, Жем Интернэйшнл ХХК, Завхан Даян дэвжээний бөх, улсын харцага Д.Бат-Эрдэнэ, Өвөрхангай аймгийн Зүүнбаян-Улаан сумын харьяат, "Алдар" спорт хороо, ЗХ-337 анги, АПУ ХК, Чиглэл ХХК, "Их Монголын Хүчтэн" дэвжээний бөх, улсын харцага Б.Цэдэнсодном нар шалгарлаа.

Наймд улсын арслан Р.Пүрэвдагва, улсын заан Б.Бат-Өлзий, улсын өсөх идэр начин Л.Энхсаруул, аймгийн харцага Б.Сайнбаяр нар шалгарлаа.

Энэхүү хандивын барилдааны дунд шөвгийн 4 болон их шөвөг, үзүүр, түрүүний бөхчүүдийг Япон улсын мэргэжлийн Сүмо бөхийн макүшита зиндаанд барилдаж байсан Н.Аюурзана Япон улсын шилдэг бүтээгдэхүүн ORIHIRO брэндийн өндөр чанартай витаминуудаар байллаа. Ташрамд дурдахад сүмоч Н.Аюурзана 2020 онд Булган аймгийн Хутаг-Өндөр сумын эмнэлэгт иж бүрэн эмнэлгийн тоноглолттой шинэ авто машиныг бэлэглэж САЙН ҮЙЛСИЙН АЯН-д нэгдэж байсан байна.

Тус барилдааны азтай үзэгч Автомашин гардсан бөгөөд барилдааны бүх орлого болон үзэгчдийн хандив, бөхчүүдийн бай шагнал, жаяг дэгийн багийнхны ажлын хөлс зэрэг нь “ЭХ ХҮҮХДИЙН ТӨЛӨӨХ ХАНДИВ” болж түүгээр Монгол орны 21 аймаг, 330 гаруй сумд нялх балчир үрсийн хагалгааг ЭХЭМҮТ-өөс удирдан чиглүүлэх алсын зайн эмчилгээний тоног төхөөрөмж авахад зориулагдах юм.

Хандивын барилдаан барилдсан бөхчүүд, ажилласан жаяг дэгийн багийнхан, үзэгч олон, хандивт нэгдсэн бүх хүмүүстээ ГҮН ТАЛАРХАЛ илэрхийлье. Сайн үйлс бүхэн түгэн дэлгэрэх болтугай.

Дараагийн барилдаан арванхоёрдугаар сарын 13-ны бямба гарагт 11:00 цагаас Сумын цолтон залуу бөхчүүдийн ээлжит барилдаан, 14-ний 14:30 цагаас Алтанцомын гуравдугаар тойргийн сүүлийн хагас барилдаанаар үргэлжилнэ.

Эх сурвалж: МОНГОЛЫН ҮНДЭСНИЙ БӨХИЙН ХОЛБОО