АНУ-д төвтэй “Global Finance” сэтгүүл дэлхийн улс орнуудыг нэг хүнд ногдох ДНБ-г худалдан авах чадварын паритет дээр үндэслэн тооцоолоход Монгол Улс ядуурлын түвшнээр 87-рт жагсжээ. Тус сэтгүүлийн тооцоолсноор Монгол Улсын нэг хүнд ногдох ДНБ нь худалдан авах чадварын паритет тооцооллоор 16,504 ам.долларт хүрсэн байна. Энэ тооцооллоор харвал манай улсаас гадна Парагвай, Өмнөд Африк, Алжир, Индонези тэргүүтэй 7 улсын ДНБ 16 мянга гаруй ам.доллароор хэмжигдэж байгаа юм.

Тус сэтгүүлийн тооцооллоор дэлхийн хамгийн ядуу улс Өмнөд Судан бөгөөд нэг хүнд ногдох ДНБ 455 ам.доллар байна. Харин хамгийн баян улс нь Люксембург. Тус улсын нэг хүнд ногдох ДНБ 143.7 мянган ам.долларт хүрчээ.

Ташрамд дурдахад худалдан авах чадварын паритет (заримдаа PPP гэж нэрлэдэг) нь валютын чадавхийг хэмжихэд ашигладаг макро эдийн засгийн чухал хэмжигдэхүүн юм. тухайн орон нутгийн валютыг ашиглан өөр өөр улс орнуудад “барааны сагс”-ын зардлыг харьцуулсан онол бөгөөд бүтээгдэхүүн дэлхий даяар АНУ-ын доллароор үнэлэгддэг гэсэн таамаглал дээр суурилдаг. Орон нутгийн валютаар бараа, үйлчилгээ худалдан авахын тулд АНУ-ын долларыг холбогдох улсад солилцох шаардлагатай ханшийг харуулдаг байна.